林峯考慮買侏儒馬送囡囡

  「2023/24香港馬季煞科日」前晚於沙田馬場舉行，為隆重其事，大會請來近日人氣高企的林峯於尾場賽事後的馬季煞科儀式獻唱，唱出歌曲《愛在記憶中找你》及《愛在三千的宇宙》。組合Zpecial 、Pandora及Nowhere Boys在賽事期間亦有獻唱助興。
林峯自認沒賭運，只識賭馬買獨贏同位置，就連抽獎運都無，反而多數出錢畀人抽獎。談到可有興趣當馬主，林峯坦言很多朋友問過不如夾份，自己未有打算，因入場機會不多，雖然拍劇時喜歡騎馬，但有點畏高，他透露3歲多的囡囡喜歡騎馬並學習中，囡囡喜歡小動物。當提議不如買匹馬給囡囡，他笑言買馬很貴，侏儒馬就得。
談到有指其太太張馨月貪圖林峯身家，但有網民發現張母擁有飲食王國，身家豐厚，可惜家道中落。林峯說：「呢啲傳聞唔重要，係小康之家！（有傳外母有意東山再起？）我都唔知道，可能佢（指太太）無講我知，不過呢啲唔好信，網上傳聞好多係假。」
力撐太太性感穿着
此外，提到太太轉新形象，林峯很滿意太太的新髮型大讚她髮量很多，頭髮還厚過他。提到太太穿低胸衫去剪髮，他撐太太謂：「正常啦！天氣太熱，我唔介意，應着乜就着乜。」林峯又指在馬場獻唱感覺似舉行小型演唱會，9月將在澳門開騷，視今次演出為巡唱熱身，他表示對上一次開騷已是5年前。