姜濤越熬越精神 Yoyo乘機撒嬌

姜濤於2022年首次擔正ViuTV劇集《季前賽》，相隔兩年後，他再孖隊友Stanley（邱士縉）及葛綽瑤（Yoyo）參演改編韓劇《無用的謊言》。劇集已經正式開鏡，《星島頭條》直擊姜濤首日為新劇開工即直踩通宵，除了花姐緊張全程傍實，劇中扮演姜濤女友的Yoyo，在第一天拍攝即施展渾身解數，向姜濤撒嬌。    
日前大約下午五時，《星島頭條》發現姜濤在花姐陪同下現身西貢一餐廳為劇集進行拍攝，姜濤乘搭私家車抵達卸貨區，由工作人員接待「一支箭」入了餐廳。未幾，女主角Yoyo亦相繼出現，兩人在餐廳內一直拍攝至凌晨時份，期間拍到攰攰哋，見一身全黑打扮的姜濤，戴住口罩走到餐廳旁邊的落地玻璃，伸一伸懶腰後即再返埋位繼續拍攝，其中一幕講述Yoyo在餐廳門口踱步，卻突然發嬲，叉住腰衝入餐廳。
私底下冇交流
直至凌晨12時，兩人終於可以稍作休息，休息期間Yoyo與工作人員都有講有笑，同時亦會拎劇本出來溫習一下；由於天氣悶熱，未理位前姜濤都會趁機除下口罩唞唞氣，更見他不停與花姐傾偈，心情輕鬆，未有因為首天拍攝而太緊張，而姜濤私底下就未有與Yoyo有任何交流，非常避忌。據知，劇情需要姜濤都經常戴口罩上陣。
休息過後，兩人換上了另一套戲服繼續拍攝，新場口講述姜濤與Yoyo在餐廳門口商量食乜嘢，之後Yoyo施展渾身解數向姜濤撒嬌，姜濤當然非常受落，Yoyo就立即好開心衝入餐廳，而姜濤亦乖乖地跟隨在後，這一幕大概拍了5次便順利完成，其後工作人員發現記者拍攝，便立即拉起黑布遮擋。
向粉絲打招呼
約凌晨1時，劇組需要轉場繼續拍攝，姜濤親民地向在西貢現場守候的姜糖（粉絲暱稱）點點頭打招呼後，便乘搭花姐的座駕離開。直至凌晨3時，花姐未有先收工，繼續傍住姜濤抵達一商業大廈，姜濤先行落車，並在停車場等埋花姐才一齊乘搭電梯，繼續通宵的拍攝，雖然已經是凌晨時份，但見姜濤依然精神奕奕，狀態大勇。