Twins真情對話淚灑紅館

Twins的鍾欣潼（阿嬌）與蔡卓妍（阿Sa）相隔9年，在香港紅館舉行14場的《TWINS SPIRIT SINCE 2001 LIVE IN HONG KONG》，前晚在紅館開鑼，全場爆滿！英皇集團楊受成博士與太太陸小曼，以及一班同門藝人容祖兒、李靖筠、楊天宇、泳兒、洪卓立、李幸倪（Gin Lee）及關智斌出席外，容祖兒媽媽、Twins家人亦到場支持。 

阿Sa與阿嬌以粉紅色Bra Top襯同色系開窿長褲出場，搭配銀色閃網衣，一口氣接連唱出多首快歌。Twins在個唱上大談9年後合體開騷感受，阿Sa表示因疫情遲了兩年開騷，希望大家盡情唱、盡情跳。Twins到後台換歌衫期間，現場電視螢幕播放不同片段，一班同門藝人亦有份參演。阿Sa同阿嬌以經典角色紫蘭仙子及紫薇仙子出現，容祖兒則化身成觀音。其中一段短片阿Sa與阿嬌扮演《鐵達尼》的男女主角，反串扮男生的阿Sa更親吻阿嬌。阿Sa同阿嬌跟陳家樂、關智斌、Gin Lee等演繹芭比主題短片。而張敬軒與阿嬌及阿Sa上演《明日戰記》一幕，軒仔將經典對白改為：「我係天網，天網就係我。」相當搞笑。
兩度再現經典側手翻
最驚喜阿Sa蔡卓妍與阿嬌鍾欣潼雖然皆年過40歲，當兩人唱出《跅跅步哈姆太郎》期間，成功連續兩次做出經典動作側手翻，依然身手了得好厲害。
阿Sa表示22年前出道，當年做一次紅館演唱會已覺得是個奇跡，再隔22年再於紅館開騷亦是奇跡。阿嬌則謂話一隊組合多年沒有拆夥好難得。阿Sa說：「我哋唔知幾時再開演唱會，你知啦！我哋年紀越來越大，唔係𡃁妹仔！要好好珍惜，唔知呢次係咪最後一次。好多人話我哋代表你哋青春，其實你哋都代表我哋嘅青春，好奇怪我哋一齊就會去返年青年代，你哋覺唔覺得後生咗？現時大家望實我哋會唔會長生不老？望我哋多啲，望多幾眼，有冇回春呀？」最感動是阿嬌與阿Sa分別道出兩人多年合作感受，阿Sa說：「22年，想像唔到呢個係我哋將來，從淚光之中走到呢個年紀，但我知道無論開心或唔開心，在人生風光時刻或低潮時期，我哋終於由一個階段走到另一個階段，但無論邊個階段，我都知道你會同我一齊，多謝你呀！鍾欣潼。」阿嬌則自認並非自信之人，亦感謝阿Sa會支持自己。她說：「有你喺我身邊，你嘅自信、你的開朗，係我學習對象，自己做嘢成日半途而廢，唯一無放棄同你嘅友誼，好感恩遇見你組成Twins，多謝你！蔡卓妍。」兩人真情對話後，亦感動落淚，就連睇騷的容祖兒也感動到不停拭淚。
手幅砌字賀阿嬌生日
適逢前晚（21日）是阿嬌的43歲生日，現場每個座位有一張手幅，寫明當阿Sa提示便舉起手幅給阿嬌驚喜。當Sa向觀眾示意後，全場歌迷即舉起不同顏色的手幅，又大唱生日歌祝賀，原本應會顯示出「GIL HBD」的字樣，豈料有不少觀眾走到台前等待握手機會，令阿Sa失預算。她說：「呢壇嘢我搞咗好耐㗎！唔緊要，我拎張原圖你睇。」