尹光激讚年輕歌手：個個都鍾意！

 79歲的尹光相隔14年後再度登紅館開個唱，他坦言既開心又有壓力，壓力是背熟歌詞同時要養好把聲。提到演唱會嘉賓，尹光坦言要由公司安排，更激讚當下年輕歌手各有各風格，令他個個都鍾意、個個都想學！
尹光將於11月4日再度踏上紅館，舉行一場《尹光 Wan K.宇宙巡邏演唱會2023》，他坦言記熟歌詞之餘更要養聲：「我哋做粵劇界會講『聲、色、藝』，聲音排第一，色就指個樣靚，藝術排第三。我平時無乜點養聲，但好鍾意響屋企唱歌，由細到大都鍾意唱歌，𠵱家年紀大咗，不及以前聲線咁好，我講嘢用上格把聲會沙沙哋，唱歌就唔會，充衡啲血唱三、五分鐘聲就會開聲啦！」
縱橫歌壇超過半世紀的尹光，歌曲的領域從來不會感覺out，經常與年輕一代接軌。早前AI尹光翻唱林家謙的《一人之境》及姜濤的《Dear My Friend,》等歌曲，引起網民熱話，尹光表示今次在個唱上會唱一系列AI歌外，亦會唱出經典歌《少理阿爸》、《掂呀》等。提到早前欣賞張敬軒演唱會時，軒仔即場以尹光唱腔哼了幾句《酷愛》，問到可會請軒仔做嘉賓？尹光說：「邀請嘉賓由公司搵，我當然想請軒仔啦！佢好多粉絲，聲線又好好，好多年輕歌手都好，個個都鍾意，個個都想學！」
擬開慈善粵曲演唱會
尹光對於唱歌永不言倦，還堅持聽不同的歌曲，無論日文、國語、英文歌都會聽，從中去學習。對於年輕一代歌手，尹光大讚各人有自己的唱歌風格，他都很喜歡，又認為歌曲能夠Hit爆即等於好。問他可想挑戰跳舞？尹光笑言不能夠，反而Rap歌無問題，他說：「家燕姐的十字步，我同佢響美國登台，佢要我同埋太太一齊跳，雖然掂掂哋，舞步簡單啲！佢教我咪跟住跳囉！」明年尹光即將踏入80歲，他透露會計劃開慈善粵曲演唱會，收入扣除成本後會做慈善用途，並會邀請圈中好友一齊唱粵曲，完成後才考慮會否開時代曲演唱會。