林嘉欣首談離婚 拒講掟煲費傳聞

45歲林嘉欣早前驚爆婚變，她與導演袁劍偉聯合發文宣布結束12年婚姻後，昨日首度出席公開活動，她表示跟前夫仍經常聯絡，同為女兒在正向氛圍成長而努力，始終是一家人，坦言女兒曾要求父母別離婚，但出奇地成熟，發現父母各自生活開心好多，至於離婚涉金錢糾紛及掟煲費傳聞，她避談：「傳聞中嘅嘢停留喺傳聞中。」
林嘉欣與韓國著名陶藝家姜俊榮現身護膚品牌期間限定店活動，嘉欣直認近年沉迷整陶瓷，笑言能與姜俊榮到韓國拍廣告，感覺像認識一位新朋友，不停向對方偷師，她認為整陶瓷感覺很療瘉，從創作陶瓷上加深對自己認識。嘉欣更透露稍後與張智霖合作新戲，雖然認識對方多年但從未合作，很期待跟好戲之人演戲。
囡囡曾要求不要離婚
嘉欣受訪時，被問到離婚後心情是否已平復？她表示跟前夫袁劍偉同樣為兩位女兒而努力，日常生活也經常會聯絡。她說：「我覺得最難（階段）已經過咗啦！當我哋落呢個決定都係想大家可以各自精彩、好正向方向帶住小朋友成長。（若有拍戲工作，如何照顧女兒？）咁就去爸爸度（指前夫袁劍偉），大家都係好朋友，始終一家人。我覺得呢樣嘢（離婚）唔係世界末日，大家都係成熟嘅人，（目的都係）為咗小朋友。」
提到有傳她跟袁劍偉因育兒看法不一，加上牽涉金錢糾紛，最終要離婚收場。嘉欣說：「呢啲都係傳說中『家家都有本難唸的經』，當做呢個決定，都想用好正向方法解決。」問到兩個囡囡是否了解兩人離婚決定？她說：「都明白！兩個女喺呢件事表現得非常成熟，出奇地適應能力強過大人！我哋不停溝通同開家庭會議，其實佢哋一路都知道嘅。我同袁導演嘅關係，無令到小朋友有任何缺失，呢個係最關鍵。（兩個囡囡可有要求不要離婚？）一定開頭係咁嘅！始終呢個係一個家庭嘅事，但我覺得經過時間，當佢哋發現父母有各自屋企，都開心咗好多喎！關鍵係希望小朋友喺正向氛圍成長。」
夥宋康昊分享演員之路
有傳袁劍偉以約1,200萬元蝕讓物業作為「掟煲費」，嘉欣身邊助手即擋駕大叫：「呢啲唔講啦！」嘉欣則說：「總之呢個決定經過大家好多思考同討論先至結束，所以傳聞中嘅嘢停留喺傳聞中。」
此外，林嘉欣將出席在浸會大學舉行的「大師班」擔任嘉賓，與韓國影帝宋康昊同台對談，分享演員之路。