周吉佩與粉絲行善 圓生日願望

《中年好聲音》冠軍周吉佩（吉吉），昨日與逾30「吉S粉」（粉絲暱稱）到社區中心探訪長者，完成今年跟粉絲行善的生日願望，加上相隔15年再出新歌，吉吉形容是一份好大的生日禮物。
活動上，吉吉即場唱出多首經典歌，更大派禮物兼與長者逐一合照，𠱁得一班長者笑騎騎大讚吉吉好靚仔。他表示成立歌迷會並不是只為聚會，反而希望行善，好開心在本月8日生日前，完成首個生日願望做公益活動。至於第二個願望，就是今日（5日）推出新歌《你是我唯一的》。「好感觸睇到公司推出呢個宣傳，我都喊咗少少。因為相隔10幾年再出歌。2023年係我一個大轉變，好夢幻。」吉吉坦言對上一次推出個人歌曲已是15年前，雖則參與樂隊時有作歌，但今次純粹個人出歌，覺得堅持同付出多年，終有少許回報，推出新歌，粉絲比他更緊張。
期待出席頒獎禮
談到樂壇頒獎禮，吉吉坦言期待出席，但不期待獎項。「我能夠呢個年紀出到新歌，又喺生日前出歌，已係一份好大嘅禮物！獎項對我嚟講係Bonus，參與到已好開心。」吉吉指太太幫他很多，除了處理歌迷會事務，亦為他安排服裝。笑問會否因而加家用？他笑說：「全份糧畀晒佢，留返少少畀我，份糧由佢安排。」
被長者說話感動
現場不少長者讚吉吉靚仔，更有追看《中年》的長者坦言因吉吉得獎而哭。「佢話睇到我得獎時都喊，我無諗過一個節目嘅觀眾層面去到咁犀利！有個102歲婆婆都吟詩我聽話有睇我，令我好感動。」談到獻唱時音樂突然停頓，吉吉笑言過往在商場演出不時都遇到，有人點歌就算不懂唱也要清唱。