梁朝偉凱旋返港：恨到流口水

梁朝偉成為首位華人演員獲《威尼斯電影節》頒發「終身成就金獅獎」，昨晨偉仔於黑雨下凱旋回歸，精神奕奕的他拿着金獅獎與太太劉嘉玲一同現身機場貴賓室通道，更開心地拿着獎座讓傳媒拍照。
偉仔受訪時指今次得獎的感受與過往不同，因感受到41年來的努力：「最感動係上到台啲人企晒起身鼓掌，覺得好似係對自己有交代。」提到他上台後感觸落淚，偉仔指因台下全部是電影人，他們起身鼓掌很久，所以感受很不一樣，對於得獎後被指為港爭光，偉仔指電影不是一個人的功勞，而是團體工作，並指從電視台開始，已受好多好導演啟發：「杜琪峯導演都啟發我好多，所以我覺得係大家成就咗我，應該大家一齊
分享。」
獲獎後重拾拍戲初心
偉仔又承認很久以前已想拿金獅獎：「我同威尼斯電影節的關係從1989年開始，哪年是侯孝賢導演的《悲情城市》第一次拿最佳電影金獅獎，當時我有些事並沒出席，跟着是陳英雄的《三輪車伕》，最後一次《色•戒》同李安去攞，當時我哋食晏，李安擺咗個獎喺到，跟住（李安）話『大家嘅』，我望到個獎，嘩！流口水呀，如果有機會就好喇，但這些不是你想就有，係好彩囉！」 
偉仔指之後會與媽咪及朋友食飯慶祝，但就不會搞慶祝派對，問到下個目標是奧斯卡？偉仔指現在拍戲想法不同了，就像回到最初拍戲的初心：「現時盡量去享受一班人一齊的旅程，拍戲九個月裏怎樣準備個角色，同一班人盡自己最大的能力做到最好，呢個先係最好玩嘅地方。」偉仔又指現在接戲只會看自己是否喜歡，對於在得獎時公開多謝嘉玲，他說：「佢咁多年一直默默支持同鼓勵我，我從來都冇多謝過佢，都應該趁呢個終身成就獎講一講。（放手畀你做你鍾意嘅事？）都係，因為最後都係我決定，套戲係我去拍，唔係佢。」
無意「復出」再唱歌
問到今次是否抽空見Wyman？偉仔指因沒直航故去了英國轉機，剛好有共同朋友請食飯慶祝，才見到對方。問他甚麼時候會再唱歌？他即笑說：「鬼有人聽咩！」
提到早前偉仔亮相韓國女團NewJeans歌曲《Cool With You》，偉仔表示NewJeans唱片公司的老闆透過他一名相識多年的朋友邀請，而對方亦滿足他三個條件：「第一，我喺邊你就喺邊到拍；第二，我個造型你唔可以管，因為係我創作角色，當然有我自己諗法；第三就係我只係得兩個鐘，因為基本上佢成個MV喺西班牙拍咗，嗰時我喺東京，佢哋就飛咗去東京用綠布景拍，因為我得幾十秒。」訪問後，偉仔在閒聊表示不知道香港黑雨，當大家笑指他是貴人招風雨，偉仔即表示「唔係」，又指到港後看到影片後才知道雨下得那麽厲害。