Lokman睇自己演出打冷顫

（星島日報報道）影帝林家棟與MIRROR隊長Lokman(楊樂文)，在鄭保瑞執導的新片《命案》中首度合作，電影創作團隊日前(19日)應邀出席柏林影展舉行世界首映禮，Lokman坦言身在60年代建築的數百觀眾席戲院內看自己演出，令他不禁「打冷顫」！
鄭保瑞偕同林家棟及Lokman出席柏林影展，不少觀眾都感到興奮，向他們索取簽名及要求合照。身為男主角，林家棟在紅地氈上表示：「多謝導演同電影公司，讓我能夠遠赴柏林，出席《命案》國際首映禮，能夠參與其中，確實與有榮焉，衷心祝福導演再創佳績。」
感到很幸福
Lokman對於《命案》能入圍被譽為歐洲三大影展之一的柏林影展，感到喜出望外：「今次嚟到柏林影展，有幾樣嘢好深感受。喺訪問嘅時候，聽到瑞導(鄭保瑞)跟家棟的對答，聽到佢哋對電影嘅深入、着迷，都令我不其然覺得要再諗多好多、好多。真心嘅，唔係擦鞋，唔係吹水！另外就係世界首映嘅戲院係60年代建築，嗰種濃厚味道，令到今次影展之旅嘅儀式感加強幾倍！最後就係喺一個幾百人嘅影院入面睇住自己嘅演出，結局之後我自己打咗一個好長、好特別嘅『冷顫』。知道可以參與柏林影展，係有一種驚喜開心。參與完柏林影展，係有一種幸福。」
演出受讚賞
今次是導演鄭保瑞繼電影《智齒》後，以《命案》再度參選柏林影展，他對此表示：「好開心能夠帶《命案》來柏林電影節同國際嘅觀眾見面，睇到好多記者朋友同觀眾對《命案》都好感興趣，亦對Lokman同家棟嘅演出表示讚賞。對於這部電影來講，係一個非常好嘅開始，希望之後會走得更好更遠！」