千嬅唱到除鞋兼落淚：兩場騷 記一世！

（星島日報報道）楊千嬅在亞博館舉行一連兩場音樂會，前晚尾場中，千嬅在台上激動表示今次開騷是自己選擇，她以最大勇氣面對結果，講到爸爸擔心她，即忍不住當場落淚。受訪時千嬅坦言做父母都會擔心仔女，她用「面對」去消化網民回應，認為人生有好有壞才完整。
前晚千嬅獲父母、奶奶及老公丁子高攜兒子Torres到場支持，眾圈中好友方力申、唐文龍、郭偉亮和太太葉佩雯、吳若希和老公、馮曦妤與老公等，以及劇集《多功能老婆》的拍檔陳煒、黃浩然及朱晨麗紛紛捧場，陳煒更帶老公睇騷。

千嬅指觀眾掌聲很有分量，坦言不知下次幾時再開騷，所以會拼命，自嘲已「過期」，但仍期望她的音樂可以無限期陪大家。唱《野孩子》前，千嬅感觸指走到現在比想像中難，歌迷大叫「撐你！」一向心口有個「勇」字的千嬅說：「勇字唔止掛在心口，而係人生上。」她激動指今次演唱會是她的選擇，會以最大勇氣來面對結果，並指在艱難日子可以做開心的事，已是過着好日子，之後提到當看到身邊愛惜她的朋友、家人，尤其爸爸很擔心她，她終忍不住落淚說：「佢哋見到我好硬淨成碌木咁企喺個台冇乜嘢，佢哋擔心又唔敢問，但feel到佢哋擔心，所以我想話俾大家聽，我會努力繼續做好自己，多謝你哋，今日每一個入嚟睇騷嘅朋友，同埋你哋嘅掌聲特別有意義、特別唔同，兩場但記一世！」

Encore時，千嬅突然落台近距離接觸歌迷，歌迷隨即蜂擁上前，千嬅感動說：「你哋有義氣呀，冇漏低我！」完場後，歌迷不願離場狂叫Encore，於是千嬅再出場，並脫掉高踭鞋，赤腳唱《可惜我是水瓶座》、《一個人的童話》，向歌迷說：「你哋就係我嘅止痛藥水，I love you！」演唱會最終於晚上11點57分完場。
未因輿論感壓力

完騷後，千嬅受訪透露在內地拍《聲生不息》而想開騷，今次有很多不同感受，指2017年開騷之後一路想返港，但因疫情取消也非壞事，自己亦未準備好，想再吸收多些，她直言未因輿論感壓力，決定回來開騷前已調整好心態，壓力是來自演出。至於為何提起爸爸就感觸？她說：「爸爸噚日傳訊息畀我話好開心見番我台上個樣，每個父母都擔心自己仔女，嗰份難過我唔驚，我處理到，但身邊人擔心我難過，就令我最難過。佢（爸爸）驚我唔開心，擔心我有壓力，但我話，你個女EQ已係神級，基本消化能力係有，但作為父母都會擔心，養兒一百歲、長憂九十九。」又指爸爸平常不會說太多，她收到鼓勵也很感動：「做仔女最緊要父母開心同健康，呢幾年體會到，除咗生死就冇咩咁介意！」

千嬅用「面對」去消化網民的回應，又謂人生有好有壞才完整：「唔可以淨係擁抱愛你或撑你嘅人，同時要接納挑戰你嘅人，咁先係完整嘅人生。做藝人需要心態成熟才可互相進步，長智慧、經歷。」問到在台上除鞋是否想宣布有喜？她即笑說：「咁唔係喜，係驚驚哋！我關節痛，噚日chok到隻腳才除鞋。」完成手上工作後，千嬅打算休息幾個月回歸家庭，笑言久沒去玩，好想旅行。