Asha同教主談情：感覺好Sweet

（星島日報報道）ViuTV新劇《百萬同居計劃》雖然由《大叔的愛》原班人馬拍攝，但今次角色關係大兜亂，上次在《大叔》與教主Anson Lo（盧瀚霆）演情敵的Asha（徐㴓喬），今次會跟教主談情，令她大讚同教主一齊「好Sweet」，至於新加入的魏浚笙（Jeffrey）則要同教主拗手瓜爭女，邊個爭贏都好，能夠同時得到教主及Jeffrey的寵幸，相信Asha先係最大贏家！
徐㴓喬在劇中飾演的阿包是一名時裝設計師，為了要接近上司霍姐（簡慕華飾）而參加同居計畫，至於Jeffrey則飾演Asha的大學同學，一直默默暗戀Asha之餘，更去同居大宅內做花王保護女方。對於今次劇集沿用《大叔》班底，Asha最放心的是不用擔心由零開始，「有返嗰個親切感喺度，所以入嚟嘅時候就再有返信心啲，我做《大叔》嗰陣對演戲仲好新，今次有種『大家都咁熟』的感覺，即使錯嗰陣都冇咁驚。」Asha面對舊拍檔安心，但新加入的Jeffrey則怕自己融入不了，所以變成「氣氛大師」搞氣氛，務求令大家的注意力落在他身上：「如果唔係，會覺得自己融入唔到，平時未拍攝前我就會咿咿哦哦撩每一個人傾偈，咁大家相熟咗之後就會好玩。」
睇星座揀男友
「阿希」這個角色，本來由呂爵安飾演，不過對方因檔期問題，最後改為Jeffrey頂上，問到是否有壓力？他直認一開始是有，因為劇中演的是一個懂得搞氣氛的有錢仔，最難的就是要在兩者中取得到平衡，「有錢仔有時講嘢嘅語氣係比較有修養、有禮貌，但如果咁樣又好難帶氣氛，所以一開始會諗邊個方向比較好，不斷試，試試下就自己有一套理論出咗嚟。」
Asha與教主演的「燈仔」在劇中一開始互相不喜歡，不過後來經歷很多事情後，燈仔就開始對Asha產生感覺，而Asha就覺得與教主談情感覺好Sweet，「之前同阿Lo做情敵，今次有得見佢更加Man嘅一面，佢要𠱁我，有啲位佢又要抱起我，係幾得意，冇尷尬嘅，都會有種幾Sweet嘅感覺。」至於Jeffrey，兩人雖是首次合作，但無論戲內戲外，Asha都認為對方是一個很舒服的朋友，「即使我哋做唔到情侶，但係都夾嘅，真係好好，同佢哋對戲好好玩，我哋都有好多三個人嘅場口。」至於Jeffrey則大讚Asha樣貌甜美外，性格亦很好，皆因當他說話沒有人理會時，Asha亦會回應他。問到現實中的Asha會挑選教主還是Jeffrey做男友，她指不知道，不過最重要的是要先跟兩人夾星座，「邊個星座同我最夾呢，我就會揀嗰個先，佢係金牛，阿Lo係巨蟹……」
真有同居感覺
提到今次拍劇的難忘事，Asha笑言劇中最有趣的是食物「連戲」的問題，「我哋有好多群戲，但拍拍下可能我哋都有啲口痕想食嘢，雖然啲嘢食係唔吸引，但大家就開始口痕係咁食食食，無時無刻都聽到有人話『冇得添，唔好再食』。」至於Jeffrey就表示因拍劇時，睡醒開工後大家又會見面，故相處下來真的有同居的感覺，一家人的感覺亦令他覺得很開心。