陳奕迅個唱破格 為粉絲簽CD

（星島日報報道）陳奕迅（Eason）相隔9年舉行個唱，前晚《Fear and Dreams》演唱會進入第三場，Eason的演出交出100分水準，台下觀眾歡呼聲不斷，當安歌環節唱出《黃金時代》，更令全場觀眾瘋狂大合唱，歌迷形容他是阿根廷足球代表隊隊長美斯！
陳奕迅出場一口氣連唱29首歌，當他唱到《幸福摩天輪》時，近舞台邊的觀眾把握機會拿出CD給他簽名，想不到Eason竟然答應，接過CD後，笑言：「我好似未試過做做吓演唱會簽CD，哈哈！」他更細心問粉絲的名字，觀眾報上名後，他又問：「睿智，係咪智慧個智？」對方大叫：「士心志呀！」不過他已手快快寫錯對方的名，笑言：「咁你今晚改名啦！」
有講有笑
他唱畢《我們萬歲》後即用消毒藥水噴手，然後除下耳機，享受觀眾的呼歡聲，他說：「雖然聽唔到你哋啲聲，都見到大家眼神，仲有嗰啲燈牌，成晚睇住『肥陳』兩個字，其實好掃興，哈哈！」歌迷即換上「歌聖」燈牌，Eason笑道：「歌聖？歌手算啦！佢哋好特別，成日整燈牌都好特別，幾十歲人仲咁有興致，我都就嚟50啦，仲有燈牌。我不嬲都唔係走偶像啦，佢哋自己畀錢整㗎！我唔會畀呢啲錢啦！留返嚟做好唱片好過，依家做CD係做紀念品咁做，仲有邊個屋企會有CD機？其實唔多。依家係電話世界嘛！我已接受咗喇！你影我啦！你唔影我，覺得自己冇存在價值！」
氣氛狂熱
他又反問觀眾：「你哋係咪從來未試過喺紅館睇一個演唱會，有歌手，由頭到尾冇斷過咁唱歌，冇乜講嘢？我成功咗喇！其實真係好正！係咪覺得聽得『入』好多？音響又好好？」觀眾大叫：「超正呀！正到黐！」Eason此刻一度感動，見他咬唇死忍想喊，又低頭用手抹臉的手勢，死忍說： 「我唔會喊，冇你哋就做唔成，不如我哋郁吓，希望大家跳到甩骹，跳到斷氣為止！」全場跟着他起身勁跳，至安歌環節，Eason選唱《黃金時代》震撼紅館，之後觀眾在社交頻道洗版留言，形容他是阿根廷足球代表隊隊長美斯！