Stanley憶事故眼泛淚光 自揭失眠

（星島日報報道）男團MIRROR自7月底紅館演唱會墮屏意外後，已停工兩個多月，最近各成員陸續開始全面復工，由姜濤和陳卓賢（Ian）擔正的重頭劇《季前賽》將於下周首播，昨日劇中各演員包括姜濤、Ian和有份參演的呂爵安（Edan）和邱士縉（Stanley）出席新劇記者會，今次亦是MIRROR成員自紅館意外後首次出席公開場合，開腔談及紅館意外後的心情。
四位MIRROR成員姜濤、陳卓賢（Ian）、呂爵安（Edan）和邱士縉（Stanley），昨日正式復工現身出席新劇《季前賽》記者會，下午約3時，姜濤率先由工作人員陪同下返回九展準備，之後Edan亦經停車場到達。由於姜濤剛從外地回港需要接受「0+3」返港檢疫措施，所以活動上全程戴口罩保護在場隊友，經理人花姐及高層魯庭暉均沒有到場。活動開始前，姜濤與Edan到場與正在打籃球的肥仔和193一齊練波，他顯得相對被動，不時企在後排叉腰。姜濤未知是否太耐沒出席公開活動，起初顯得有點緊張，而比賽上半場被指防守有點迷茫，到下半場他漸進入狀態成功入球得分。兩隊表現落力，4子均有入球，最終由Ian一隊勝出，姜濤隊落敗要受罰彈額頭，幸Ian錫住姜濤只是輕力。
活動後MIRROR四子接受訪問，問到心情如何？Edan表示這段時間12人心裏也不一樣，也需要時間消化：「期間同公司傾過兩個月後出返嚟工作，期間會有評估，唔OK嘅就會同公司講。」至於姜濤則表示記者會前一晚心情覺得非常緊張：「始終兩個幾月以來第一次出嚟見大家，始終要收拾心情、勇敢面對，同大家一齊。」至於眼泛淚光的Stanley則表示要靠時間慢慢平服，不會完全沒事，現在只能慢慢收拾心情。問他是否習慣？Stanley：「未完全習慣，公司都會因應情況去安排工作。」至於Ian則表示會好好調整自己：「始終（事故之後）第一次同大家見面，要好好預備心態，沉澱一段時間，而家要去整頓思緒。」
Edan信時間可淡化
問會否想起意外畫面？Edan相信事件對大家有一定影響，他說：「有一段時間會想為甚麼會這樣？相信時間可以令件事慢慢唔再咁唔舒服。」姜濤亦說：「一直想起件事，無辦法，唔會咁快就可以消化件事。好難想像傷者阿Mo心情，始終要好好收拾，重新去面對。」Stanley眼紅紅說事發後有一段長時間很難入睡，表演上受傷的人和他一樣（舞蹈員）出身，所以自己更上心，公司有請醫師評估情況，自言心情正常，情況不太嚴重。問到有否機會探望阿Mo？Stanley直言很想去探，但公司認為人數上不是很適合。問到公司未有正式聲明是否不恰當？Edan表示明白大家想法，相信公司一定給予大家回應。
對於辭演電影《拼命三郎》，Ian指推戲是一個重大的決定，他感激電影公司給予這機會：「始終第一部戲，好緊張，當時係8月，評估過之後覺得當時嘅自己係未做到，雖然當時電影公司話可以等到10月，但冇呢個必要，要人哋百幾人嘅團隊等我一個，無理由因為咁而拖累大家進度，亦都唔知自己狀態勝唔勝任。（目前狀態如何？）好難話自己目前係準備好，要沉澱。」
外遊捱轟 姜濤激動
至於剛與家人外遊回港的姜濤，被網民指他及MIRROR成員盧瀚霆（Anson Lo）與李駿傑（Jeremy）在這段時間外遊做法不當，姜濤就表示很明白大家會有這想法，但當時的自己是想離開一下，語畢姜濤心情開始激動到說不出話，Edan即時代答：「可能用旅行放鬆未必係適合選擇，但對於我哋嚟講，放鬆嘅方式真係唔多，但去唔同嘅地方暫時放低包袱亦係選擇。」而對於Edan被指與袁澧林撻着，他就否認，表示兩人只是好朋友。另外，193表示這兩個月大家心情不好，休息一段時間後亦是時候出來工作。早前確診的張繼聰已康復，表示幸好家人沒被感染。