陳曉華陳家樂演情侶角色反差大

（星島日報報道）TVB新劇《異空感應》昨日試造型，陳曉華（Hera）在劇中飾演警察，角色要穿越時空，她收到劇本時睇到「頭爆」，要看三次做很多筆記才較為理解。今次她因角色需要打，獲監製安排上武術堂，學了兩星期，她笑說暫時算合格，不過久沒做運動加上之前韌帶撕裂，頭兩日上堂已弄傷頸和大髀肌肉，令她在之後的訓練感辛苦，但只休息兩日就繼續練。她又為角色用一個月時間刻意壓低聲音說話，令感覺更硬朗。劇中Hera與陳家樂一對，問她是否有親熱戲？她說：「暫時未見到，不過劇本睇落好sweet，對白好肉麻，搞到我好尷尬。（同《美麗戰場》角色反差好大？）係，呢次係大人嘅戀愛，都好嘅，兩種都試吓，拍完套劇可能會知自己鍾意咩男人。」提到在《美麗戰場》飾演的林小美是繼「反骨琪」後，成為觀眾最想掌摑的角色，Hera笑言：「我拍時都覺得林小美好蠢，但細個啲嘅女仔都可能會戀愛大過天，（現實中係咪咁蠢？）梗係唔係啦，所以我而家覺得呢個角色好啱我，我現實中係男仔頭。」
因病暴瘦
陳家樂剛度過36歲生日，生日正日與未婚妻連詩雅度過，他透露明年中的婚禮有機會延期，因工作已排到明年3月，加上連詩雅要到外地工作。他笑言不敢問老闆楊受成送甚麼結婚禮物，老闆出席已好開心。家樂自爆早前到寧波工作瘦了20磅：「可能唔慣食得太油膩，同埋生腎石有關，以為生過腎石唔會再生，點知返內地隔離完一出關即入醫院，都有屙返（腎石）出嚟，不過真係好痛。」