張兆輝挑戰78頁對白 慘過會考

（星島日報報道）張兆輝雖然身在內地，但今個月分別有《被消失的凶案》、《一樣的天空》兩部主演的電影上映，其中在《被》片重演1983年轟動全城的「水箱藏屍案」。輝哥不擔心自己打自己，希望觀眾入場支持，更期望停擺多時的香港電影業盡快回復正常。
電影《被消失的凶案》導演羅守耀與輝哥合作無間，故事藍本為1983年的「土瓜灣道水箱藏屍案」，當年輝哥忙於拍劇，未有留意這宗轟動新聞，他坦言：「83年，我日拍夜拍，冇留意這單新聞，但唔緊要，羅導演搜羅好多資料、報紙，以及他知道的蛛絲馬迹，都會話畀我哋聽，令我明白點樣去演繹，亦清楚導演想拍乜嘢、想表達乜嘢。」事件事隔三十多年後搬上大銀幕，輝哥是羅導演欽點的靈魂人物，戲中由他去調查懸案，輝哥謙稱：「哈哈！可能我真係似嗰個老差骨囉！同羅生合作過好多次，佢非常了解我可以畀到乜嘢佢，而演員知道導演想點做便去做，我一直相信係角色帶動演員，今次好多謝羅生寫呢個角色俾我！」
拍到唔知天黑
問到拍攝的難忘事，輝哥笑言最深刻的是一場被律政處審問的戲，對白有78頁紙，在室內拍了五、六天，燈一直長開，拍到天黑也不知，有時還要即時改劇本，笑言圍讀時好似考會考，但大家仍然拍得好開心。
談到政府放寬防疫措施，讓戲院重開，同時有兩部電影於本月上映的輝哥表示：「咁啱啫！當然戲院重開，大家都好開心，等咗咁耐，疫情大家都好想去舒展吓、睇吓戲，能夠有咁多好戲上亦好難得，俾多幾套我一齊打都得！」雖然自己打自己，但兩部戲種不同，角色性格亦有很大反差，輝哥稱在兩部戲都有很大發揮。