譚耀文負傷 孖黃德斌廚房肉搏

（星島日報報道）電影《逃獄兄弟3》片中，由獄長淪為階下囚的黃德斌，與譚耀文飾演的獄中大佬起了激烈衝突，譚哥在一場打鬥戲負傷上陣，與德斌埋身打鬥。其實譚哥拍《逃獄2》時已因一場翻車戲傷了肋骨，由於第二集和第三集是同時拍攝，當拍到和德斌在廚房打鬥的高潮場面，譚哥負傷在身但仍瞓身肉搏，毫不錫身。
已習慣帶傷拍攝的譚哥表示：「習慣晒，自從做演員以嚟，真係咩傷都受過晒，好彩對手係經驗豐富嘅德斌，拍得放心之餘效果又好。不過印象最深刻記得我拍第一部電影就被一位泰拳高手打甩咗隻牙，可能佢以為喺擂台上面，所以唔怪得佢，咁我執番隻牙就即刻去醫院，止完血再返現場繼續完成拍攝！」德斌也知譚哥受傷，在拍攝時特別小心，直言擔心會再傷到他，但大家都很專業，加上武指在場度招，過程辛苦但最後都順利完成。