熊黛林重拾一覺瞓天光感覺

（星島日報報道）TVB節目《日日媽媽聲》前晚播出第二集，請來熊黛林（Lynn）、胡諾言及阮兆祥擔任嘉賓。Lynn透露當年孖女在她肚裏已展現出不同性格：「一個好懶，一日先踢兩、三吓，我成日同佢講：『BB，唔好唔郁呀，媽咪好驚！』另一個就不停係咁踢，Feel到佢以後一定好動。」湊BB最辛苦是夜晚「冇覺好瞓」，何況要同時照顧兩個BB，Lynn說：「有時啱啱呢個瞓咗，另一個就醒咗，跟住可能佢會嘈醒另一個，成晚係咁循環發生，完全冇瞓過覺。」她又笑指起初餵母乳覺得「一邊一個」好幸福，後來因太辛苦而改為泵母乳餵哺。 
Lynn還笑言最近復出工作，完全沒掛住孖女，因為終可重拾「一覺瞓天光」的感覺，不過外出工作數個月後，回家有孖女送上熱情抱抱，令她甜在心頭：「兩個一齊坐我大髀攬實我，嗰種感覺好冧。」