軒仔紅館開騷 獲林明禎冧送榴槤「包開」

（星島日報報道）張敬軒《THE NEXT 20演唱會》前晚在紅館重開舉行首場，邀得大馬女神林明禎和陳柏宇雙嘉賓現身，林明禎特別帶來大馬手信貓山王榴槤送給軒仔，更在台上連環施冧功。觀眾對軒仔演唱會嘉賓名單高度關注，惹來黃牛黨趁機借姜濤做嘉賓炒賣黃牛飛，軒仔和姜濤即時發文以正視聽。
軒仔前晚表示今次16場演唱會的每一場都會當尾場去做，前晚更邀來兩位特別嘉賓，當中女神林明禎出場即引起全場哄動，她坦言好緊張，對軒仔笑着說：「我何德何能站上紅館這個舞台跟你合唱？」軒仔即回話：「我何德何能請到新一代女神同我合唱就真！你今晚靚到……美人魚咁呀！」明禎就甜笑回覆：「今日我係最幸福女子。」接着又向軒仔表示在社交網經常見他吃白麵包，營養不良，所以特別從大馬帶來禮物給他，並拿出一個貓山王榴槤，笑言：「你早餐可以食麵包加榴槤，咁先夠營養。」軒仔反問：「我平日買的都是已打開的榴槤，你咁樣畀我，我唔知點開。」女神馬上發功：「我可以去幫你開呀，你打電話畀我，或者text我。」軒仔笑問觀眾：「你哋有冇發覺，佢唔知點解對眼長期水汪汪。唔怪得被網友封女神……有冇cam可以影吓佢對眼畀大家睇吓？」女神就乖巧回話：「我係見到你才會這樣。」搞到軒仔為之語塞，觀眾大笑。
粉絲送紙紮鐘獲回禮
此外，軒仔也請來好友陳柏宇合唱《斷點》，說假如將來有機會做組合都一定揀相識多年的對方，Jason直言揀軒仔的《斷點》合唱有故事，這首歌是他入行前參加歌唱比賽得到錄音機會第一次錄的歌，很有紀念價值。
前晚軒仔發現台下有歌迷「詭異」高舉紙紮牌，即指着對方說：「呢位朋友每次整啲好配合紅磡主題的燈牌畀我！你送個鐘畀我？紙紮鐘？真係好嘢！仲要剛好12個字都係我扮MIRROR個樣！就憑你呢份創意，我真係要回返個禮畀你，就係我私人家屬票，送兩張尾場山頂位畀你！工作人員幫我mark一mark呢個老兄，佢個牌，幫我化咗佢。你一陣睇完騷去玻璃門等，其他附近地方啲門你都咪隨意入！大吉利是！」
前晚捧軒仔場的嘉賓包括泳兒、楊天宇、吳浩康、艾妮、劉若寶、郭思、朱天、楊政龍及許佩斯。
黃牛黨帳戶秒速消失
昨日（11日）有黃牛黨在社交網借姜濤之名發放軒仔演唱會「特別場公告：姜濤嘉賓」的假消息，揚言14日（周六）有姜濤擔任嘉賓，惹起一眾「姜糖」四出撲飛。軒仔即在該貼文留言親自澄清：「你嘅消息來源唔正確，多謝支持」。姜濤也轉發該網友的消息直指「FAKE」，並禮貌地tag軒仔寫道：「但祝前輩演唱會一切順利」。軒仔轉發貼文回應姜濤：「多謝姜！你都要勞逸結合，工作繁忙都要注意休息」。其後，該「黃牛黨」帳戶秒速消失。
對於張敬軒演唱會流傳不同嘉賓名單，英皇娛樂演唱會部總監馮貽柏表示，流傳的嘉賓名單當中存在很多幻想及虛構，相信聰明觀眾不會相信這些流傳消息，並指每晚嘉賓於當晚到場才會公布，給予大家驚喜。