伍允龍唔忿氣被叫奀星

（星島日報報道）伍允龍及安志杰在TVB節目《諸朋好友》被問及過去難忘感情經歷，安志杰指有段時間被人稱為某某男友好無奈，令人聯想到當年他與謝婷婷拍拖經歷。伍允龍亦有共嗚，雖然訪問中沒提及女方名字，但當年他與鍾嘉欣曾有一段無疾而終感情，他直言：「當年我成日畀人叫茄喱啡、奀星，但其實我拍咗好多戲，亦好努力去做，好似《賭城風雲》一個鏡頭被車撞，我撞咗成25次，又試過由一樓跳落嚟差啲斷腳，但都冇人知，我唔係投訴，只係唔明白點解焦點會放喺同邊個拍拖。」
問到何不放棄？他說：「當年是開心嘅，只係對方因工作問題要收埋我少少，我OK嘅。（覺得電視台畀壓力？）我明嘅，當時佢好紅，而我係Nobody，因為工作要收埋我，呢一行係咁，但覺得過分咗去做呢件事，變咗個傷害喺我度。」他指今時不同往日，拍拖已可光明正大，直言當年被棒打鴛鴦有不滿及不開心：「係唔忿氣，但長大咗，過咗去，咁啱當時TVB有幾部劇搵我，但我經理人覺得唔適合推咗。」他想入TVB證明自己有價值，讓大家看到工作態度，之後遇到《城寨英雄》成功入屋。