毛姐最愛Edan：好恨有個咁嘅仔

（星島日報報道）毛舜筠（毛姐）近期多了「鏡媽」這個稱號，因一口氣接拍的3部電影，都是與MIRROR成員合作，分別是姜濤、Jer、Edan及Anson Lo；適逢好友李婉華對MIRROR 12子都相當鍾愛，昨日二人首次在各自的網上頻道合體進行聯播時，李婉華直言對毛姐能與「鏡仔」合作「流晒口水」，不斷追問細節和趣事。
昨日毛姐與李婉華在網上合體聯播，期間與MIRROR 4子埋身接觸過的毛姐就大爆他們不為人知的一面，指姜濤原來是「問題兒童」、Jer就「sweet到爆」，Anson Lo則「好乖」，Edan更獲最高評價，令毛姐也忍不住開心自爆新戲中將與Edan再結母子緣！
大讚Edan有家教
毛姐在《過時過節》與「登神CP」合作，雖然跟Anson Lo很少對手戲，但毛姐也稱讚Anson Lo很乖，經常會虛心問意見。至於飾演其兒子的Edan，毛姐就讚不絕口：「佢好有家教，看得出係得到父母花上好多心血和教育栽培，說話有紋路，係4人當中最有智慧，而且EQ好高，能日日對住個咁嘅仔會好快樂，相信作為父母的都好『恨』有個咁嘅仔，如果保證能生到個咁嘅仔，我唔怕生多個！佢仲好用心演戲，係一個唔會放棄的人，要做到最好，我好鍾意佢！」
四個鏡仔各有各可愛
眾所周知，毛姐與姜濤拍攝《阿媽有咗第二個》經常互相偷拍瞓覺相，毛姐謂：「姜濤好百厭又好可愛，仲係偷拍高手，好鍾意偷影人瞓覺，搞到我無餐好瞓，有時不自覺瞓着就慘了，試過被佢拍到我劈大口反晒眼睡相，真係追足佢九條街、衫都扯甩晒咁要佢刪片！佢仲係『問題兒童』好多嘢問，答唔到仲唔肯罷休，會纏住唔放，試過唔同佢癲選擇走人，點知佢會跟住咁繼續問，令拍攝期間好多歡樂。」
毛姐又表示不能忽略同樣可愛的Jer：「Jer的性格較為內斂怕羞，今次係佢第一次拍戲，所以一直很專注在角色上，不過看到我的助手拍攝日常花絮時，佢試過隔住塊板唱歌畀我呢個媽咪聽，佢做埋心心手勢，真係好sweet。」毛姐總結指，4個鏡仔個個不同、個個可愛、姜濤有自己的魅力，Jer有自己的可愛、思想簡單，令人相處好舒服；最後毛姐還自爆在即將開拍的新片中，將與Edan再度合作。