ANSONBEAN自下禁令：五年內不拍拖

（星島日報報道）ANSONBEAN（陳毅燊）新歌Sweet到爆、MV更大玩「女友視角」，不過原來他完全未試過這些甜蜜場口，更為自己下「拍拖禁令」、計畫5年內不拍拖，全力向歌影視發展，最希望有機會拍動作片。

新歌《you made my day》已面世，ANSONBEAN於上月加推與麗英的合唱版；獨唱版MV中大玩「女友視角」，而合唱版MV則和麗英撐枱腳兼互餵食，甜蜜無極限，不過ANSONBEAN本身反而完全不了解女友的視角！「我完全係聽導演指揮，導演叫我飲檸茶就飲，叫我笑就笑。」

提到他被爆中學時已拍拖，他坦白直認，但原來不是表面的一回事，「我中學時的確拍過兩次拖，但其實又可以話唔算係拍過拖，因為我唔係好識浪漫，MV中好多情節都冇做過，今次嚮導演身上學到好多嘢，相信5年後我會係一個好好嘅男朋友。因為去年同細佬傾偈，講到預計下一次會幾時拍拖，我就直覺應該係5年後，事關當時參加《全民造星III》，練習和綵排已經用咗好多時間，如果連讀書時間都冇，就更加唔使諗拍拖。」

被問中學至今喜歡的女仔類型有否不同？ANSONBEAN表示：「現在對大家在『夾』方面會要求更嚴格，同埋我喜歡頭髮蓬鬆、眼神銳利嘅女仔，因髮質好緊要，能顯示女仔有幾注重自己嘅頭髮，而且頭髮搖晃時會好飄逸。（喜歡被女仔的頭髮搖晃？）又唔係，但行路時會好吸引；至於眼神銳利就會好Sharp醒，容易被對方電親，更加加分。」至於本身是否黐身男？他笑言：「以前係『Long D』所以唔知，要下回分解；不過大家都有各自生活，如果男仔或女仔太黐身應該會令人好忟憎。」

在男神、歌神、廚神當道的時代，轉數快的ANSONBEAN笑言以「豆神」為目標！「『豆神』可以不用受任何框架限制，仲可以做CEO，全方位咁加入唔同種類嘅『神級』部門，哈哈。」ANSONBEAN除了唱歌，還開始拍劇及電影，並指很想拍有打鬥、槍戰、追逐的動作片。笑指還有一類是愛情動作片，他即「怕醜男」上身口窒窒說：「吓！我唔知喎……未拍過……都不妨試吓，挑戰自己極限。（想拍檔是男還是女？）吓！女仔啦……但男仔又好似冇咁尷尬，可能我會冇咁怕羞……哎呀……唔知呀……都係睇劇本！」不過說到有好劇本，他就豪氣指不會設底綫，「一個演員在演戲時就不是自己，最緊要是專心及夠專業。」