嘉穎自嘲幾十歲仍有團火

(星島日報報道)有份參演反貪風暴電影系列《L風暴》、《P風暴》的鄭嘉穎，來到終極篇《G風暴》飾演廉政公署調查主任，因戲中胞弟黃宗澤犯法，將會在親情與公義下決擇。嘉穎透露終極篇《G風暴》比以往電影系列有更多爆炸場面，不過今次他在中環蘭桂芳拍攝打鬥戲時，遇到外籍酒客搞事，他說：「有啲外國人初時八卦又笑下，然後不停升級，跟住講粗口，又話入鏡係咪拍佢？後期大家啲火就嚟！因為阻住拍攝又無禮貌，我同佢理論，爭啲加動作場面！係武師㩒住我，但最後都拍攝順利。」他坦言事後反省亦自覺有不對，若再有類似事件發生，應該會走開待劇組處理，今次可謂經一事長一智，更自嘲幾十歲仍然有團火、幾奇怪。
嘉穎和太太陳凱琳婚後育有兩子鄭承悅（Rafael）和鄭承亮（Yannick ），他笑言成為人父後說話要謹慎，皆因大仔Rafael開始長大，試過模仿他說話：「有次駕車載佢放學時，有人駕車唔打燈cut線，我只係講句『打燈啦！』，Rafael即跟住講，無論語氣各樣都學足，我心諗好彩無加助語詞！自此說話好小心。」
雖然成為人父，但嘉穎坦言不能為錫身而不拍動作戲，反而覺得只能選擇接不接拍，任何演出不多不少都會有動作戲，就算他在劇集《星空下的仁醫》飾演醫生也有追賊戲分，所以難以避免，唯有小心一點：「我左膝有舊傷，如果有太難動作真係做唔到，並唔係唔想做，我處理到一定做。」至於可會考慮接拍需要操肌的電影，嘉穎坦言劇本吸引的話亦不妨一試，若然要變成《激戰》的張家輝般大隻身形，則非常大挑戰，他說：「見到佢咁樣，你知道佢背後付出幾多？當去到某個年紀操身形變成咁大隻，係要雙倍代價，家輝操到身形好靚。反而好想演繹一個人物的一生，自傳式電影。」
家庭始終擺第一
近年轉戰影壇的鄭嘉穎，雖則歌手出身，但他笑言再推出歌曲的機會不大，皆因經常在家為兒子唱《Baby Shark》，做點唱歌手。談到是否較享受在家中做歌手？他說：「開心程度同滿足感不同，觀眾的掌聲同小朋友一齊唱又唔同，呢期享受同小朋友唱，係開心些。」由於疫情影響，往返內地需要頗長的隔離期，所以嘉穎寧願留港照顧家庭，放棄賺錢機會，他說：「雖然錢賺少咗，但係人生有得有失，我唔會為賺少錢而遺憾，反而會因為無陪伴兒子成長而遺憾，我覺得應該滿足啦！好似電影對我人生來講錦上添花，又不能乜都要晒，如果要揀，我會選擇家庭擺第一。」