黃子華孖師弟潘燦良上演「大叔的恨」

(星島日報報道)黃子華、潘燦良將聯手合演舞台劇《最後禮物》，主辦單位英皇娛樂日前重本於清水灣片廠搭建大型場景，讓兩位視帝、劇帝拍攝宣傳海報，兩人對視拍照，未上台已渾身是戲。子華預告今次劇中還有好多猛人，如身在外國就應「嗱嗱聲」返港隔離之後趕及入場睇。

《最後禮物》於香港演藝學院一連舉行30場演出，兩位首屈一指的演員均是香港話劇團出身，多年來才首次有緣合作，子華離開香港話劇團後、阿燦才加入，名副其實是阿燦師兄。阿燦坦言今次能與師兄子華合作，加上劇本出自最佳編劇莊梅岩，所以立馬首肯。子華則謙稱一向視阿燦為偶像，大部分阿燦有份演出的劇都有看，非常開心期待合作，讓阿燦受寵若驚。

五年沒演舞台劇，子華讓觀眾等到頸都長，他笑言：「我一直有開電影嘛！今次能夠同我偶像潘燦良合作，真係夢寐以求，潘燦良應該係我喺香港舞台上，睇得佢最多戲的人，粗略估計我睇咗佢十部演出或以上，所以好開心可以同佢合作。」談到今次演出的故事，子華笑言 ：「我地呢部劇叫《最後禮物》，近年大叔好吃香嘛，好流行大叔的愛，我覺得我哋呢部劇有權改名叫：《大叔的恨》呀，哈哈……我同阿燦呢兩個大叔，喺部劇裏面恨到出面。」阿燦搭嘴：「應該係有好多愛先產生咁大恨，哈哈！」

由於時間緊逼，兩人已開始投入綵排，又因疫情關係，編劇莊梅岩身在外國暫未能到港，以致開會、圍讀以及即將展開綵排都是用視像方式溝通。子華謂：「綵排應該會搵部機做直播俾佢睇住先。我哋之前已圍讀過一次，都幾震撼，因為我冇諗過，坐喺度一齊演出的演員，位位都係舞台劇界可以獨當一面的朋友，稍後大家都會知道有幾多猛人同我哋一齊演出，呢個咁重量級製作，如果你喺外國都應該拿拿聲返來隔離，希望你隔離完仲可以入場睇得切，哈哈！」