胡鴻鈞笑炎明熹似木頭人

(星島日報報道)炎明熹（Gigi）和胡鴻鈞（Hubert）昨日為港台音樂節目錄影，Hubert笑指Gigi似《魷魚遊戲》的木頭人，被對方望住就不敢郁。Gigi則笑言若有機會開拍港版《魷魚遊戲》，自己都想演出。

Hubert坦言希望將來可跟Gigi唱合唱歌，又認為對方很年輕，拍劇時可盡量享受和吸收經驗，亦可多向前輩請教，他說：「唱歌方面，她唔使貼士，只需要多啲經驗，透過自己的經歷同人生經驗，令唱歌更加有個人魅力。」Hubert又指羨慕一班「聲夢」學員夠年輕，自嘲雖然心態年輕，但肉體並不年輕，不過非常戥他們開心，因為在這資訊發達的年代，比以前吸收更多事物，可見他們或擁有更多的個人特色，自己也想跟他們多交流、給予新衝擊。Hubert更笑指Gigi好似韓劇《魷魚遊戲》中的木頭人，所以被對方望住就會不敢郁動，又搞笑叫Gigi別瞪住他。

被指似木頭人的Gigi，笑言在學校時瞪一瞪同學就會入戲、不敢郁動，又指若有機會開拍港版《魷魚遊戲》都會想演出，藉此可以增進演技。

此外，提到好友許廷鏗（Alfred）在社交網開直播時，有假帳號聲稱曾嘉晴被他搞大個肚，對此Hubert表示：「我睇報道見到，最緊要當事人澄清返係誤會，好彩我未遇過呢啲事，遇過熱情粉絲，但唔會盜用帳號或入侵我嘅生活，都係向我表達支持同愛意，我o依家都有保留粉絲寫給我的信。」Gigi則謂未遇過瘋狂粉絲，反而試過演唱會後跟粉絲見面時，被一班粉絲手包圍住、好有愛。