姜濤使出彈額神功 Anson Lo痛到標淚

(星島日報報道)MIRROR早前接受音樂平台訪問，大玩「蒙著嘴大電視」，難得12子合體，眾人都變回大細路，玩得非常投入，期間更笑料百出，教主Anson Lo接受大懲罰時被隊友捉住連環彈額頭，痛到標眼淚！

12子分成兩隊，「普通組」由Anson Lo（盧瀚霆）做動作，帶領Alton（王智德）、姜濤、Ian（陳卓賢）、Tiger（邱傲然）、Frankie （陳瑞輝），而「精英組」則由Edan（呂爵安）做動作，帶領Lokman（楊樂文）、Jeremy（李駿傑）、Jer（柳應廷）、Ak（江𤒹生）及Stanley（邱士縉）。首先由「普通組」先開始，Anson Lo 相當落力做動作，可惜隊友完全估唔到，更一副嫌棄的樣子，笑指：「你講幾多個字先！」「你知唔知自己做緊乜？」最後他們一隊只得6分。

至於「精英組」的實力相對厲害得多，其中要估「花姐」兩字，Edan更做出大肚腩手勢來形容，AK則秒速估中，Jeremy即搞笑問：「點解花姐係咁嘅？」最後Edan一隊以15分勝出。

由於「普通組」大比數落敗，各隊員一致舉手投票由Anson Lo接受大懲罰，再全員通過由同組隊員姜濤負責彈對方額頭。AL非常緊張，大嗌救命表示︰「你哋畀我心理準備下先！」又叫Edan唔好捉住佢塊面，接着又問姜濤︰「你知道係彈額頭㗎？你隻手可唔可以高少少？」在AL扭扭擰擰下，姜濤狠心表示：「捉住佢隻手！」身邊隊友夾手夾腳捉住AL，在姜濤數三聲下完美擊中AL的額頭，姜濤更指，平時除咗練習唱歌跳舞，第三樣就係練彈額頭。

正當Tiger想說快啲再彈第二吓時，他口快快說：「趁佢（AL）未紅……」AK即搶着說︰「阿Lo未紅？」Tiger即刻解釋：「額頭未紅！」場面爆笑！當彈完第二吓時，AL已眼泛淚光，呆了幾秒，網民好笑之餘，亦紛紛留言表示心痛。落敗隊伍最後更要落力推介12子的口罩，姜濤表示：「每日根據你嘅心情，去用唔同嘅顏色。」而被彈完的AL似乎仲未回魂，笑指：「做緊咩啊o依家？」只簡單表示：「好舒服！」姜濤即刻借勢話：「咁嚟多次（彈額頭）……！」遊戲在歡笑聲中完結。