尊重四哥敬業精神 馮寶寶想同家棟演情侶

(星島日報報道)身處馬來西亞的馮寶寶（Bobo姐），雖然未能回港為主演的電影《殺出個黃昏》宣傳，但她透過網上連線接受訪問、分享拍攝心情。首次使用Zoom的Bobo姐表現風趣幽默，還拿出電影《92黑玫瑰對黑玫瑰》中的「掌門鈴」出來，相當爆笑。

Bobo姐笑言接拍該片的原因是被監製林家棟誠意打動，對方專登前來馬來西亞講解劇情兼請食飯，最重要還有謝賢（四哥）參演，皆因當年兩人在粵語片年代合作演父女，還會叫四哥做「Daddy」，她說：「雖然我同四哥「Daddy」係同一年代行過來，但不是同一輩份，當時我5歲咋！如果我可以陪佢跑—個圈幾難得呢？我有向監製家棟講可不可以申請健力士世界紀錄大全，因為好少可仲未死、兩個演員相隔60年仲健康可以再次合作，好難得！」今次跟四哥相隔60年再度合作， Bobo姐大讚四哥腰身挺直，就連手臂、胸肌都沒有下垂，行出來的剪影依然有型，但今次再次重遇對四哥多一份尊敬，她說：「我覺得四哥並不是純粹為貪靚，他同我講這世人無做過第二份工作，好後生就做男主角，所以要對得住這個職業，要堅持保持身形，先至不會令觀眾失望，我好尊重他仍然保持這一份精神。」

談到戲中與賈曉晨上演一場婆媳大戰， Bobo姐坦言其角色「蔡鳳」的個性太腍善，現實中一定不會讓自己去到這個情況：「如果我遇到個人不懂尊重我的話，我會避開，無謂傷感情同離間兒子的夫妻關係，希望我的兒子識揀啦！」她又笑言這場鬧交戲好辛苦，拍了兩、三個take，鬧到她無氣鬧，感覺好疲倦。

談到家棟曾透露有意開拍前傳，問到哪位女星可演她的年輕版？她笑說：「唔畀！如果電影菲林可以美圖、修圖，拍前傳就關我事啦！但點解一定要拍前傳？不可以原班人馬開拍另一個故事呢？點解我由28歲就開始要演呂方媽媽、葉童媽媽呢？所以若再有機會拍戲，希望我可以靚靚出來示人！」Bobo姐亦感謝遇到林家棟這位好監製，對方每日都會到片場，還親身示範表情、提點如何演，笑言有點相逢恨晚。當提議下次不如跟家棟扮演情侶？Bobo姐笑說：「咁就要修圖，得唔得㗎？（家棟化老妝遷就你？）這提議非常好，哈哈！」