靚佬湯撐英格蘭 請球隊睇《壯志凌雲2》

(星島日報報道)美國動作巨星湯告魯斯（Tom Cruise）正在英國拍攝《職業特工隊7》，上周六他在倫敦溫布頓球場欣賞溫布頓女子網球賽，還跟《職》片緋聞女友Hayley Atwell和拍檔Pom Klementieff同行。香港時間昨日凌晨溫布萊球場上演英格蘭對意大利的歐國盃決賽，靚佬湯再入場睇波，同場還有前球星碧咸（David Beckham）、英國名模Kate Moss、英國男星祖迪羅（Jude Law）及兒子Raff Law、威廉王子夫婦及大仔喬治王子，靚佬湯跟碧咸在觀眾席雞啄唔斷。靚佬湯在賽前更跟英格蘭國家隊視像通話，英格蘭隊長哈利簡尼（Harry Kane）受訪時表示昨日黃昏跟靚佬湯對話，球隊更獲邀率先欣賞靚佬湯主演的《壯志凌雲︰獨行俠》，但要簽下保密協議。可惜英格蘭在射12碼中以2比3敗於意大利，失去奪冠機會，無法再創造歷史。

《職7》今年6月再次因有工作人員染疫而停工兩周，有傳靚佬湯是其中一名染疫者，但如今靚佬湯連日睇球賽，更精神奕奕。上月亦有傳《職7》已因疫情延誤多時，作為監製及主演的靚佬湯必須於8月前拍畢電影。