Edan拍賀歲片最驚喊唔出 君如真傳秘技

(星島日報報道)ViuTV新劇《大叔的愛》成為城中熱話，Edan（呂爵安）的喜劇細胞更獲認同，而獲吳君如賞識拍攝賀歲片《闔家辣》的Edan，因戲中不乏多場內心戲，令初登大銀幕的他十分擔心，早前拍攝一場被君如安慰的戲份時，Edan便緊張得全程零笑容，相當認真！

由吳君如擔任監製兼演出、新晉導演鄭晉軒執導兼編劇、鄒凱光任執行監製的賀歲片《闔家辣》拍攝已進入最後階段。早前吳君如與男主角Edan在村屋外的小巴站演對手戲，Edan以一頭微鬈髮、身穿綠色運動服配襯黃色膠鞋現身，造型可愛。未正式拍攝時，首次進軍大銀幕的Edan不敢怠慢，與君如排排坐在小巴外的椅子上排戲。最搞笑的是排戲期間，君如突然爆句：「快啲拍啦！要睇《大叔的愛》。」

當天拍攝現場有廿多名粉絲「爵屎」到場支持偶像，更有人專誠買來糕慰勞Edan及劇組人員。由於取景拍攝地點接近民居住所，亦吸引不少街坊圍觀。

君如與Edan戲中扮演一家人，當晚見君如不時摸着Edan手仔，又唱《萬水千山總是情》安慰對方；片中不乏內心感情戲、演戲經驗尚淺的Edan表示，早前拍攝一場重感情戲時自己也很擔心。他說：「君如很好，畀很多方法我揀，不敢說自己演得好好，但起碼演的時候感受到情緒，今次真係學到好多嘢。」在旁的吳君如表示事前不知道Edan擔心演感情戲，因為該片是一部喜劇，毋須喊苦喊忽，但Edan是男主角，所以必須要有爆發點。她說：「導演同我講話Edan好驚喊不出，我話唔得啦！等我畀啲練習他做，咁OK呀！Edan即刻明晒，已經做到。」

提到演出該片與多位前輩鄭中基、梁詠琪及君如合作，Edan坦言學了很多，君如即笑說：「你唔好咁謙虛啦！你囂啲！你話自己做得好好，現時唔興咁謙虛㗎！」Edan笑謂自己囂不起，君如即說：「我話你囂得起，就囂得起啦！」對於Edan主演的《大叔的愛》備受讚賞，身為監製的君如說：「Edan有一種特別氣質，這種氣質係可以做正劇，又可以拍喜劇。當日這部戲casting，我仲諗住現時MIRROR咁鬼紅，邊會睬你？日日排山倒海咁多工作，但佢又肯嚟喎！睇完試鏡後，真係Edan啦！無他人之選。」

此外，君如表示香港受疫情影響，今次開拍賀歲片目的是希望市民在農曆新年期間入場睇戲可以開心吓。Edan笑說：「我哋唔止套戲賀歲，就連在片場都好賀歲，君如瘋狂『萬歲』，每日都好多嘢食，好開心㗎！」經常「萬歲」的君如，笑言一定要吃勻十八區，因為難得在香港拍戲，當然要在十八區找來不同的美食。