趙學而自爆姊弟戀經驗豐富

(星島日報報道)趙學而及阮小儀在ViuTV節目《中女唔易做》中分別化身電器售貨員及農夫，體驗藝人以外的生活，二人異口同聲指中女唔難做，反而享受那份忠於自己的快樂！

何謂中女？趙學而認為30多歲已屆中女，雖然當時甩拖兼負資產，但一個人更見自由自在，「我對自己幾有信心，反正拍少一陣拖問題不大，正好趁單身去遊歷世界，認識更多人再慢慢揀囉！」小儀則在30歲之齡跟拍拖多年的男友分手：「當時覺得死喇！入行後更難識男仔，我咁嘅樣喎，森美當時也說若圈外人要找女藝人當伴侶，點會夠膽搵我，唔驚畀人笑咩？其實單身中女更加驚，尤其是30至40歲那幾年，擔心自己冇機會結婚生仔，但過了40歲後，生仔機會更渺茫，世界反而不一樣了，開始隨遇而安，知道自己不是要名份上的肯定，只想找一個伴。」

小儀不諱言以往的壓力及煩惱是自找，忠於自己後反而活得更瀟灑，就算面對「小鮮肉」Edan@MIRROR也公然「心心眼」，無懼世人目光，亦不抗拒姊弟戀，「悲觀地看，人生是倒數，正正是因為倒數，反而每分每秒都要善待自己，過得精采，所以年齡不是問題，最重要是溝通到。」學而自詡姊弟戀經驗豐富，只要二人的思想能同步便可以，總好過每天家嘈屋閉。

學而坦言中女在心態上的轉變不少，希望在有限的時間做一些令自己值得驕傲的事，例如跟後生女分享養生之道，更笑言有意與小儀合力開設網上頻道談傾「女人經」，甚至性事；小儀即笑說：「想唔想試吓麻繩？我都想試吓呀，哈哈！或者我們一齊探討更年期也可以。」學而又指女人要欣賞自己不同階段的美，不要老是跟人比較，「人一定會老，一定會有皺紋、雀斑及眼袋等，這些瑕疵陪伴我們成長，不能抹走，所以我不接受打針美容。」

小儀同樣崇尚自然美，又笑言童顏全因生得矮，並非Keep得好，「如果我193咁高，但配我的樣子，大家也不會覺得我童顏啦，哈哈！」她又謂現在不像20多歲時只顧着工作、搵錢及獲取認同，因急燥的生活節奏令甲狀腺出現問題，令健康響起警號，如今已學懂享受生活。