林夏薇踩入潮界搞藝術精品展

(星島日報報道)林夏薇（薇薇）與老公莫贊生結婚6年，婚後受老公影響的她愛上潮流藝術精品，近日更宣布在尖沙嘴舉行首個藝術展覽，薇薇親力親為宣傳，除了在社交網站連出多個post分享這件事，更與老公突襲展覽現場，並化身導覽員為展品解說，談到受老公影響，她笑說：「佢本身好鍾意，所以我哋會一齊儲；之前都有講過，如果有新生意會以自己有興趣嘅項目為主，因而促成今次展覽。」

向來對投資甚有心得的薇薇，繼點心生意後再搞藝術展覽，她透露籌備已久：「之前一直籌備緊新嘅投資項目，呢個係其中一樣，就係為期一個月嘅藝術展。今次係同先生以及另一位拍檔合作。」薇薇曾在社交平台公開模型珍藏而引起網民關注，她笑言：「唔同階段都有唔同嘅收藏品，細個嘅時候身邊朋友最鍾意買毛公仔，我反而鍾意儲龍珠閃卡，現時睇番都覺得好靚！之後儲過唔同款式嘅香水樽；再大個啲就儲潮流藝術品，我屋企有好多1比1嘅人型模型。」