伊健帶隊落田耕種當做運動

(星島日報報道)鄭伊健早前為經理人林珊珊的網上頻道《大家好ALL IS WELL》與浸會大學學生合作拍片，體驗做一日農夫！有落田經驗的伊健帶備新款太陽帽，拿出來即被搶空。珊珊孖女兒「西瓜」和「野人」初次下田即愛上耕種。

當日伊健帶着珊珊及其兩個女兒西瓜（李澄）和野人（李怡）一起體驗農夫生活，初次下田的珊珊更是一試就愛上，計畫往後租田多多體驗鄉郊生活。平日熱愛運動的伊健早有準備，知道今次要到農場體驗，就帶備新款有型的太陽帽來拍攝，不過當一展示出來即被搶空。

之前已有多次種田體驗的伊健又說：「珊珊佢哋應該就係第一次，所以每樣嘢佢哋都會覺得好新奇，有時會問一啲意想唔到嘅問題，初時會奇怪佢哋點解會咁問，但可能第一次真係好多嘢唔知，或者觀眾都唔一定知，今次嚟到呢度體驗農夫生活令我哋認識多咗農場嘅嘢。」

伊健也認為大家城市人，為令自己身體健康，間中去郊外拎起鋤頭，總好過全日坐，並指：「耕種嚴格來講都係一種運動，不過係最輕鬆嘅運動，我覺得一啲都唔辛苦，有時間係應該多啲到郊外參與耕種。食物對香港人嚟講好重要，但太少人參與種植，所以應該支持呢個落田概念。」

珊珊雖然首次落田，但她自言已經愛上這個活動，她說：「一直好期待，其實我一直都好想試，所以由開會聽到話要做一日農夫，已經好開心好興奮。到現場勞動咗一日，就更加想租一塊田來耕種，剛才問過呢度啲朋友話真係可以租，公司同事都好支持我，希望可以好快實現。」

身旁的西瓜也插嘴說：「其實我嚟之前好擔心，唔知應唔應付到，因為自己平時有啲嬌生慣養又怕蟲又怕濕，估唔到雖然唔熟手，我又雞手鴨腳，又跌嘢又差啲將個鋤頭鋤到人。」身為瑜伽導師的野人也很享受今次的體驗，她說：「今日只係畀自己60分，如果冇時間嘅限制，應該可以做得更好！」