金燕玲：唔難受 但真係好驚

（星島日報報道）前年戰勝子宮癌的金燕玲最近開YouTube頻道，近日首次上載短片，片中她分享抗癌經歷，不過不是兩年前的子宮癌，而是透露自己再次與癌魔交鋒——於農曆新年前摸到自己左胸有異，檢查後確定患乳癌，她坦言不難受但幾驚，幸只需開刀割除硬塊，不需切除乳房，現已出院休養等候做電療。

金燕玲在新開設的個人網上頻道「金燕玲 隨心．隨興」中，談及在農曆新年前發現身體有異：「今次我做拉筋時候突然摸到自己左胸摸有一粒嘢，諗一晚之後，第二朝一早去問醫生可以點做？檢查完後，捱到年初五證實係cancer。」她亦透露乳癌屬1期B，開刀割除硬塊後無需切除乳房，但一定要電療，她覺得已是很幸運。

再度患癌，金燕玲在片中分享時也不禁多次哽咽，她強忍眼淚坦言：「我唔係難受，但呢個經歷真係幾驚；胸對女人真係幾緊要。」她也提到醫生表示情況樂觀，因硬塊不算好大而且很清，幸運是沒擴散，她留院兩晚，手術後第二日已出院，回家休息後翌日已經出街，還笑問觀眾是否覺得很癲！

期間她輕拭淚，呼籲網民不時要「自摸」檢查，她平時都沒刻意摸自己，今次經驗告知，雖然自己不知有甚麼問題，但發現有問題就要即刻去見醫生。她也續稱：「可能有人會覺得，哎吔金燕玲有冇搞錯呀、又生cancer！係呀，我乜都打孖嚟，流感時有兩個流感，兩年後又有第二個cancer，但我覺得自己係好幸福同好幸運嘅人，兩個cancer都係不幸中大幸，所以如果真係可以幫到人，都希望分享資訊畀大家。」

金燕玲密友蘇施黃亦在社交網分享兩人於上周五拍攝的合照，指照片攝於金燕玲接受手術後，照片中的金燕玲氣色很好。阿蘇表示：「『金燕玲 隨心．隨興』一出，有很多朋友及粉絲慰問。金小姐叫我代感謝大家，佢真係好犀利的，做完手術第二日已出院，第三天已出街，佢話唔好當自己有病匿埋喺屋企喎！我做司機蘇，駕車也小心翼翼，費事揼親佢，衷心多謝大家關心！」阿蘇也指金燕玲身體和精神非常好，起碼一個月後才做電療，暫未知幾時。