保錡宣布停工免拖累ERROR 隊友發聲齊撐

(星島日報報道)男團ERROR成員吳保錡被負面新聞纏身，上月被揭與「沙律」張沛樂的戀情後，前任女友賴嘉賢（Carrie）指他從未提出分手，被指感情生活混亂，未正面面對感情問題的他，隨後又在直播中爆粗罵粉絲，形象插落谷底。事後保錡選擇「潛水」，至前晚在社交網發長文，自覺影響ERROR成員而選擇暫停所有工作，並向粉絲們致歉，疑似宣布退團。

保錡表示反思作出抉擇，寫道：「反思咗好多晚，雖然我講咗好多次會重新出發，但覺得依然欠大家一個交代。我意識到一方面我之前處理感情嘅事做得唔好，另一方面，當晚直播嘅言行舉止係好唔啱，說話亦無尊重過人。呢啲全部都係我嘅過失，我要面對自己嘅錯，出嚟同大家再次道歉。」對於自己為隊友帶來影響，保錡表示將暫停所有工作：「我已經同公司講，喺完成手頭上已開始嘅工作之後，所有工作將會暫停。我亦唔會參與任何節目及ERROR歌曲嘅宣傳。我認為咁樣係一個對我應有嘅懲罰，希望唔好累到其他兄弟，亦唔好因為我嘅關係而抹煞咗所有人嘅心血。」

保錡希望粉絲繼續支持ERROR，言詞如「退團」：「o依家回憶返過去同三位兄弟一齊做嘢真係好珍貴，嚟緊ERROR嘅團歌，希望大家繼續支持佢哋。」最後他再次向粉絲道歉：「我知道保錡喺大家眼中係一個毫無分寸嘅人，但希望下次大家再見到我嘅時候，會見到一個懂得尊重、願意承擔責任嘅人。我希望用行動證明。再次同大家講多次對唔住。」

其經理人花姐回應：「尊重保錡決定，俾啲時間佢沉澱，知道佢今次好內疚，覺得佢上了人生一課，我有信心保錡再見大家的時候會變得更好更成熟，期待再見到ERROR 4子嘅畫面。」其後在限時動態留言：「上了人生一課，Respect你願意面對錯的勇氣，相信不久將來會見到更好的你，期待再見到ERROR四子的畫面。」隊長肥仔亦轉發保錡的帖文並留言：「一世人四兄弟，有你有我哋，實撐你！」隊友郭嘉駿（193）則說：「人誰無過，錯而能改，善莫大焉。」隊友阿Dee說：「保錡大個仔，越嚟越立體。」並hastag ERROR四位一體。