張敬軒認與關智斌有「多重關係」

(星島日報報道)張敬軒、倪晨曦（Elva）、陳柏宇（Jason）和楊文蔚出席網上理財分享會。對於好友關智斌（Kenny）有靚仔新歡，軒仔笑稱與對方仍然有多重關係；Elva則稱有意再追小朋友、但要先休息兩年。

軒仔受訪時表示已有半年沒跟傳媒見面，感覺恍如隔世，笑稱這半年主要是「洗腸」，事關工人姐姐每日都是炮製白粥和麵包做早餐，還爆工人姐姐日前另有新搞作！他謂：「工人姐姐都知道我有笑佢，原本諗住係禮貌嘅提醒，點知佢仲變本加厲，近日仲整爆煲，我冇諗過個煲會『冧』先過我，個煲如果有生命應該會講『Sir，我走先，你慢慢捱』！我同工人姐姐就好似鬥命長咁！」不過，軒仔亦大讚工人姐姐除了廚藝，可值120分之高，因清潔方面非常之乾淨，二人可互補；又慶幸疫境下仍的到客戶支持有工作，餐廳亦有老顧客的支持，祝願大家齊心合力，有信心大家能捱過這個難關。

提到Kenny被指身邊出現了靚仔新歡Edwin Pun，軒仔說：「我哋前幾日先嚮公司團年飯見過面，o依家爆相爆片有500（元），早知我都爆啲獨家猛料。（認識Edwin？）我哋身邊有咁多朋友，點會識得晒，娛樂新聞睇完得啖笑，最緊要大家生活愉快，身體健康！（與Kenny的關係轉淡？）何來淡呢？我哋有好多重關係，嚮公司係同事，私人層面就係出生入死嘅戰友，經常會通電話傾工作和新安排，我仲叫咗個音樂品牌幫佢做歌。」

Elva高興指囝囝Virgil剛過了100日就自動戒夜奶，一覺瞓到天光，亦不算扭計；不過工作時就很不捨得囝囝，會不停視像隔着鏡頭叫BB，還爆與老公不停搶着教囝囝叫爹哋和媽咪。說到網民大讚Virgil靚仔，盡得其真傳，Elva也覺囝囝似自己，但大個後樣貌會變，可能到時似爸爸。問到會否再追？Elva直認有這個意思，與老公已有共識先休息再努力，事關生育後很攰，絕不輕鬆，還要適應新生活，瘦身也不容易，當藝人要對自己有高要求不能鬆懈，現還要多減4、5磅才能回復以前狀態。