林愷鈴騰雞靠華仔開解

(星島日報報道)關信輝執導、劉德華（華仔）擔任監製兼主演電影《熱血合唱團》，除了有多位資深演員李麗珍、盧冠廷及關禮傑等坐鎮，亦有一班年青演員伍詠詩、林愷鈴及王智寬等扮演出，他們扮演Band 3學生組成合唱團參加比賽，情節笑中有淚，相當勵志。

戲中扮演指揮家嚴Sir的華仔，表示開拍前原本想搵素人演這個角色，後來被導演及劇組說服後答應演出。他說：「佢哋o氹我話，你一定要去學做指揮家，因為你好似指揮家，於是搵了兒童合唱團指揮家，都跟咗差不多三個月，學到最後原來佢哋話『拍子就係咁！表達同溝通先至更加重要，每個指揮家都有自己獨特動作』。雖然係難，但係開心嘅。」今次與多位年輕演員合作，華仔坦言過程中發現他們每一個演員有自己想表達歌唱的方式，又認為每個人只要能夠搵到方向，一定會成為心裏面的主角。他說：「跟他們一起學懂了一些保持青春的能力，被一班年輕人包圍住，自己好似好有存在感，好享受。」

戲中是扮演愛情至上中學生的林愷鈴，笑言現實中的她，由細到大對任何事很理性，又認為工作較為吸引，現在忙到連睡覺時間也不足。她說：「我覺得自己對感情方面比較遲鈍，未必分得清人哋想同我拍拖定做朋友？不過覺得所有事順其自然。」談到戲中𠝹手一幕，要與華仔演對手戲。她坦言拍攝前感到大壓力，但華仔好懂得令對手冷靜。她說：「拍完後有工作人員話見到我身上咪高峰，我就好擔心，係咪要再拍呢？但太陽已落山又落雨！我好騰雞，華仔就話唔使驚，現時連一條龍都可以執響天空上，點一點就無咗啦！」雖然首度演出電影，但林愷鈴坦言媽媽龔慈恩未有教路，因為媽媽認為目前並非給予觀眾睇到她有沒有天分的時刻，反而應該讓大家看到她的熱誠與真誠，所以不想刻意教她。

與尹揚明演一對父女的伍詠詩，表示對方的角色跟現實中的爸爸一樣大男人，亦同樣不懂跟女兒表達感情，她說：「我以前跟爸爸溝通唔到，因為爸爸不會表達自己，會將情緒發泄在我身上，細個唔明白，大個後開始理解他不懂表達，所以會嘗試同他溝通。但好幸運，無論我入行與否，爸爸畀我自由度好大，他說只要我做喜歡的事都會支持。」伍詠詩透露演出學生群戲時，表現得不太自然，但華仔好懂得搞氣氛，令大家好輕鬆似Band 3學生上堂一樣。