梁漢文帶蘇康囝囝遊園睇靚女

(星島日報報道)疫情稍為緩和，大家雖未敢鬆懈，但至少鬆一口氣，不少家長都更放心帶小朋友出外「放電」，連忙籌備演唱會的梁漢文（Edmond）未做爸爸都「客串」湊B，趁主題樂園重開即第一時間陪好兄弟蘇永康的囝囝Jazz去玩，更爆Jazz人仔細細識睇靚姐姐。

梁漢文積極籌備10月紅館個唱，早前已開始地獄式減肥，不時在社交網分享心得，不過昨日他不分享減肥，反而晒自己做湊仔公的短片。原來他放假陪蘇永康的囝囝Jazz去主題樂園玩，期間都有戴口罩抗疫，一大一細齊齊排隊等玩機動遊戲。不過Edmond就爆Jazz撩他傾睇女經，真惹笑。Edmond留言提到拖蘇永康的囝囝Jazz排隊時，Jazz突然講：「對面排緊隊個姐姐好靚。」令他笑言：「咁遠你都睇到，果然有你老竇嘅遠見同埋遺傳。」惹網友好奇問蘇永康有否跟囝囝一齊睇靚女。

此外，杜德偉也在社交網分享他和太太Ice攜同囝囝AJ，賀太太的五妹Zoe取得法院頒發大律師資格，除了Ice娘家總動員，Alex的哥哥杜德智也有出席。Alex當日一身西裝出席盛會，囝囝AJ也結了小領呔，兩父子齊齊型格現身。Alex分享一家人合照，開心留言：「五妹拿到大律師牌照，恭喜恭喜！I am so proud of you. 第一次上法院係因為喜事，真係戥外父外母高興，今次大姐夫叨光了！」

反而近日回港拍劇的鍾嘉欣則要跟一對子女分隔兩地，她上周在社交網透露已返港，並上載自己的居家抗疫電子手環照片，準備完成14日隔離之後，下月跟馬國明、鄭嘉穎合演無線新劇《兒童醫院》。由於疫情關係，嘉欣未能帶同一對仔女由溫哥華返港，她近年一直定居當地專心做全職太太和媽媽，為拍劇要離開小朋友一段日子，她一時間當然不習慣，不但要把子女的照片帶在身邊，還帶了囡囡Kelly用的卡通水壺返港，實行「見壺如見人」。