免人多播疫 馬化騰取消門口派利是

(星島日報報道)武漢肺炎來勢洶洶，就連騰訊（700）亦都招架不住，公司延續咗近20年嘅傳統，年初八返工「逗利是」都被逼取消！除咗公布取消呢個傳統外，騰訊亦提醒大家少近人群多戴口罩，同埋少掂家禽勤洗手，取消咗雖然會少咗些過年氣氛，不過為了員工的身體健康着想，呢個決定都係令人理解嘅。

過往每年，騰訊喺農曆年正月初八返工之際，「老世」馬化騰會率領一眾管理層，喺公司門口同每一個員工派利是，並且講一句「新年快樂！」，好多員工都可以藉此目睹馬化騰嘅「廬山真面目」，因此每年嘅呢個時候，據聞好多員工會由朝早五、六點開始排隊，騰訊深圳總部外都會「打晒蛇餅」。

據悉馬化騰呢幾日為咗測試微信紅包嘅新功能，接連幾日喺朋友圈發微視視頻紅包，雖然取消咗面對面嘅「派利是」傳統，唔知會唔會試用呢個新方式嚟延續傳統呢？