滬深港通獎 摩通三組別入三甲

(星島日報報道)香港同內地市場互聯互通，表現愈來愈好，交易不斷創新高，港交所（388）噚日頒發多個2019年度滬深港通獎項畀成績優秀嘅市場功臣。摩通在五個組別中，三個組別都入三甲，滙控則在兩個組別中獲獎。

港交所行政總裁李小加就話，滬深港通已經成為國際投資者投資內地股票市場嘅首選平台。截至今年10月底，經滬深港通流入A股市場嘅淨資金達8600億元人仔，而香港及海外投資者通過滬深股通持有嘅內地股票總值達1.22萬億元人仔。

今年嘅獎項包括有2019年度滬深港通北向成交量最高，以及特別獨立戶口開設數量最多嘅經紀商、年內排名升幅最大經紀商、滬深港通北向交易存管資產最大規模嘅託管銀行。其中，北向交易最活躍嘅經紀商分別係中金、摩通同瑞銀；北向成交額升幅三強要數東方財富國際、光大新鴻基及中泰國際。滙豐、摩通及渣打包攬三大最高存管資產規模託管銀行。另外，最多特別獨立戶口參與大獎花落瑞士信貸證券、花旗環球金融及滙豐證券經紀。