譚耀文入「五」最注重健康

(星島日報報道)今年正式入「五」踏入50歲的譚耀文，坦言對事情看淡，亦會注意健康謝絕飲酒，更認為最緊要開心，做事情覺得要適合自己。

譚耀文（阿譚）於電影《不義之戰》與一眾演員、唐文龍、梁琤、何佩瑜、大馬女神林明禎及余曉彤等合作，戲中不少飛車和槍戰戲，阿譚直言該片算是入行以來最多槍戰戲的一部電影！由於導演喜愛玩槍械，對方拍攝槍戰手法很唯美，不過最有難度是跟女演員拍打戲，自己會遷就去打，不會出太大力：「個個女演員好想打，當拎起槍着件背心好似上晒身，唔睇得都打得。導演要求好高，開槍時要好近距離。雖然經驗豐富，都會有少少驚。」

戲中飾演香港警隊警司的阿譚與當年劇集《縱橫四海》的舊拍檔楊恭如再度重聚合作，戲中兩人扮演一對夫妻。對於跟楊恭如相隔多年後再次合作，阿譚坦言今次楊恭如客串演出，大家沒有太多時間傾偈，但感覺依然，勾起不少合作的回憶：「導演跟恭如有交情，就諗搵個女演員演我太太，但戲分不多又要有經驗同靚女，仲要大家認識她，就諗到恭如，不過不是好容易請返來㗎！但冇乜時間傾偈，有時拍完一個鏡頭，趁轉位時會傾吓。」

今年正式入「五」踏入50歲的譚耀文，進入人生下半場。譚耀文坦言對事情會看淡，反而會關注健康，更笑謂健康到連自己也不相信：「依家我無飲酒、消夜同應酬，就算有朋友聚會都會諗過先，總之要飲酒就不適合，覺得飲完又唔係特別開心，唔飲仲開心！咁飲嚟做乜？」

歌手出身的他，轉戰影壇多年，直言現時有玩樂器，亦有想過重返音樂方面，但認為實行好難。「演出《風雲》後，有幾個投資方找我開演唱會，但當時有好多片約在身，拍戲後自己又無咗件事，不過我都想開騷，但等自己唱得再好些先。我發覺自己喜歡音樂多於唱歌，希望做得更全面，但不會話特登鋪路做歌手，入『五』後唔會諗太多，無乜所謂，最緊要開心，做事物覺得適合自己。」

打滾影壇多年的譚耀文，曾於「香港電影金像獎頒獎禮」奪得「最佳男配角」獎項，亦在海外影展上勇奪「最佳男主角」殊榮。談到可想於「香港電影金像獎頒獎禮」一嘗影帝滋味，譚耀文直言若以前問他會答好想，但現在覺得隨緣：「得到獎唔係話你就好叻演戲，未能得獎亦不代表不懂演戲，只不過在戲中角色令大家覺得討好，但入到圍或得獎，都係一個光榮。若得不到獎係咪覺得永遠喺呢個層次之下？No！因為已經係一個主角，有時做吓配角幾豐富，這樣的話反而思維會變闊，自信不會容易被外圍因素打低自己。」