Kenny尾場騷被軒仔錫面 全場沸騰

(星島日報報道)關智斌（Kenny）的首個紅館個唱前晚進行尾場演出，更加插了送吻致謝環節，緋聞好友張敬軒在半推半就下快閃式咀了Kenny面頰一下，更開心得跳起豎手指公， 令全場氣氛推至極點。經理人霍汶希透露，此環節是公司特別安排給Kenny的驚喜。

一連兩場的《Kenny is Born關智斌演唱會》前晚於紅館圓滿落幕，重量級嘉賓包括容祖兒、Twins、張敬軒與古巨基再度登場，英皇老闆楊受成夫婦，JW（王灝兒）與男友、余安安、陳家樂、衛詩雅、泳兒，鍾舒漫，許靖韻，陳瀅與鄭融等現身捧場。

Twins的阿Sa（蔡卓妍）一上台即向Kenny表示：「昨晚我媽媽睇完你的演唱會，上年紀的女士見到台上男歌手除衫都會很興奮，我阿媽更一直以為我跟你是一對，哈哈！家長都熱愛幻想，我阿媽又話我同Kenny去旅行都係住同一房間，我想講係因為我哋都吝嗇，逼於無奈才住同一房間。」之後阿Sa送上火龍果要求Kenny即場吃，引來全場大笑，只因火龍果是Kenny好友張敬軒的別名，阿Sa更抵死地笑言：「你都好耐無食。」

容祖兒與Kenny合唱時一度撞咪，祖兒說：「我想話支咪係張智斌的。哈哈！……兩枝棍一齊撞吓撞吓，我講咪咋。」Kenny即謂：「我個演唱會很健康的。」

當軒仔一出場，便引來全場瘋狂尖叫，他笑言：「昨晚啲人話紅館係核爆式掌聲與叫聲。」 之後軒仔又口快快講錯嘢：「以下這首歌是他（Kenny）睇住我寫的……呀，唔係……」全場再度大叫， 軒仔即說：「人生得一知己，死而無憾。」又引來全場尖叫。

及至安歌環節，Kenny笑言：「相信我係第一個在紅館握手握到喊的歌手，因為見回很多熟悉的面孔，大家特別來支持我，我會好好珍惜。」Kenny向祖兒致謝時，直指她是全公司的盾牌，有甚麼事她都會頂住，令她全身傷痕纍纍。當Kenny多謝軒仔時，全場又瘋狂大叫，他說：「佢幫我演唱會好多，調音、想流程，怎樣幫我演唱會盡善盡美，雖然我都知自己有好多沙石瑕疵。」

唱完最後一首歌《大男孩》後，Kenny表示不捨得走，此時坐在台下的祖兒、阿Sa、軒仔與基仔齊齊上台，阿嬌則因翌日早機已早走。Kenny更跪謝幾位好友， 祖兒即抵死搞氣氛謂：「既然你咁多謝我哋，就逐個咀一下囉！」引來全場起哄。之後基仔開始錫Kenny的面珠，祖兒和阿Sa更齊齊與Kenny嘴對嘴親吻。剩下軒仔時，阿Sa抵死地說：「我好驚，剛剛已經錫面錫嘴，唔知之後會錫邊度呢？」基仔還叫軒仔搽定潤唇膏，最終軒仔主動以閃電般快錫了Kenny的臉頰，然後開心得豎起手指公並跳起，令全場瘋狂尖叫！之後眾人合唱《眼紅館》，將整個演唱會氣氛帶到最高峰圓滿落幕。

在慶功宴上問到是否與軒仔「復合」？Kenny說：「見面錫一吓，就像日常見到祖兒也錫一吓一樣。（被軒仔咀完是否尷尬？ ）我整晚跟祖兒、基仔和霍汶希都咀過，我哋關係太好，就像家人一樣。（是否將軒仔當作家人？）看到佢哋咁支持已經知道，所以沒甚麼尷尬，與感情無關，是家人角色。」經理人霍汶希又透露，演唱會上的錫錫環節是公司精心編排的一部分，Kenny事前並不知道。

另外，問到可有邀請前拍檔張致恒（Steven）來紅館捧場？Kenny坦言有邀請對方來看，但他沒有現身，他說：「Steven曾是我家人的一部分，但他仍未面對到大家，我話唔緊要，用時間，做好自己，做好自己角色時，我哋隨時也歡迎他。」