關智斌「嬲爆」黃宗澤甩底

（星島日報報道）關智斌距離舉行個人紅館騷還有不足十日，怎料開唱在即卻遭答允當表演嘉賓的黃宗澤「放飛機」，慘呼心碎，不過獲好友張敬軒為處男騷用陰力調音，就封定利是作回報！

關智斌（Kenny）、黃宗澤（Bosco）和鄧麗欣（Stephy）前晚出席品牌活動，不過當Bosco遇上Kenny，第一句就說：「我深感內疚、慚愧、不快兼心虛，因為兄弟一場，原本應承Kenny做佢演唱會表演嘉賓，但撞了期要飛往日本拍攝。不過我都有主動自薦為佢拍片或錄開場白，但佢唔覆短訊，可能佢嬲咗我，所以我都嬲佢，互嬲！」Kenny笑謂：「Bosco應該內疚，因為佢答應咗我又飛走，令我心碎！（沒有回覆Bosco短訊？）係咩，我咁衰咩？因為同佢拍戲的3、4個月中，佢經常整蠱我，分唔清佢邊句講真、邊句係假，最好的方法係『冷』處理，不聞、不問、不回覆！不過要佢拍片就實在太過大材小用，原本想佢一齊上台高歌一曲，跟住畀個膠袋佢，等佢可以還樂壇一個交代。」

講到張敬軒主動為他做調音師、更提供上門服務，Kenny搞笑謂：「嘩！佢咁抵得諗？佢已經調完容祖兒個音10幾日，仲有時間幫人上門調音？不過我今次係處男騷，真係需要好好調音。（是否如軒仔所言，調音用輕輕的陰力較適宜？）咁話晒係我第一次，難免會緊張，真係要畀封利是佢！如果佢調得好，我仲會畀佢上台講兩句，宣傳佢11月的演唱會。」對於拍檔張致恆（Steven）日前註冊，Kenny謂：「當日我已經傳短訊恭喜佢，佢無叫我觀禮，可能想低調啲，我亦唔介意，佢話之後會約食飯或補辦婚宴，到時我都會去。」至於已跟Steven割席的軒仔和Twins會否出席飯局？Kenny則表示要留待他們本人回答，亦未有正面回應是否借錢給Steven還債，只道二人相識多年，有時會互相支付費用，所以不會記在心裏。

而Bosco未能借Kenny舞台還樂壇一個交代，就改為要求Stephy開騷讓他做嘉賓圓夢，怎料Stephy稱：「可能要等到天荒地老。」問到Bosco會否再出新歌？他表示不會，之前的新歌《發夢之王》不過是玩票性質說要有個交代。至於Stephy則否認幫助傅穎回港發展的報道，指對方有自己的公司，不用她代勞，但承認大家有互相關注社交網站及有私訊傾偈。談到粉絲希望Cookies合體，Stephy謂：「咁太複雜了，牽涉到好多事，涉及的已經有生了小朋友的兩個媽咪，加上吳雨霏又就快生B，即將要迎接漫長的湊B之路……但都唔係無可能，只係唔知要等到幾時，或者黃宗澤開騷，Cookies合體為佢做嘉賓，事關一切都有可能！」她繼而扯開話題，稱暫時較為空閒，待月底才飛往台灣為當地第二間果汁新店開幕，又透露馬來西亞和加拿大都有果汁分店，但不會親自前往巡視業務。笑指Stephy可趁空閒結婚生仔，她即輕呼：「呢幾年成日被催結婚、催生仔，催到覺得自己好似無機會咁，總之未有計畫，一切順其自然。」