單身小方呻食自己遭中基寸

(星島日報報道)鄭中基於前晚第三場《One More Time世界巡迴演唱會》，請來曾於《美女廚房》合作過的好拍檔梁漢文（Edmond）和方力申擔任表演嘉賓，大放笑彈！

當Edmond問觀眾有沒有掛住他們時？小方反問：「掛住乜？坑渠水味意粉還是屎味魚蛋？」聽到鄭中基稱十年無睇過《美女廚房》，Edmond更正指最近有做，小方卻反駁道：「嗰個係假㗎！」繼而鄭中基建議再合作，但以《美男廚房》取代美女，笑謂：「我哋已經有家室，唔可以再亂咁食嘢o依。」小方投訴道：「你哋兩個上晒岸，但我仲係single，當年我唔係single就安分守己，o依家single就要食自己。」鄭中基笑指如果小方想快點有女朋友就去投胎！

小方又自言太耐無搞真的很需要……原來他指的是很想搞番個節目，明日就搵TVB傾。鄭中基笑指不一定要TVB，現在還有ViuTV。Edmond更稱要有大志，要直接搞個電視台，可播晒他們的歌和戲，仲要搞埋頒獎禮，全部獎都頒給他們，而電視台就定名為「T Viu B」，還向觀眾逗利是，笑言是集資開台，令全場爆笑。