陳展鵬結婚派對不醉無歸

(星島日報報道)陳展鵬、單文柔日前舉行婚禮，前晚再於中環舉行結婚派對，麥明詩、馮盈盈、黃君馨、張名雅、鄺潔楹、何雁詩、鄭俊弘及丁子朗等圈中好友現身到賀。

一對新人約晚上8時50分現身，陳展鵬拖着太太單文柔（Phoebe），笑容滿面接受訪問，單文柔笑言不習慣被叫陳太：「唔係好慣，好多人叫，都開心嘅。（屋企互稱老公老婆？）都係叫番英文名多。」談到婚後轉變，她說：「暫時未覺得有轉變，有諗過點去做一個人妻，要再努力啲照顧佢。」展鵬說：「人妻都係個叫法，做番自己最好最舒服。」問太太廚藝如何？展鵬笑說：「美女廚房試過啦，私下試過佢手勢，OK嘅。煲湯會多啲，我鍾意飲湯。」展鵬還坦言不太清楚有哪些藝人到賀，因都是透過經理人及其他藝人幫手轉發邀請：「之前擺酒係屋企人食飯，雙方家長亦想低調。今次大家唔需要咁拘束，可以盡興一啲。」談到是否不醉無歸？他笑說：「其實我都唔係咁飲得，如果真係要飲就試下，好耐無醉過！不過Phoebe聽日要開工，都要點到即止。」

麥明詩、馮盈盈及丁子朗出席完「TVB 50+1 周年再出發」現身到賀，坦言因行程匆忙，只帶了心意到賀，禮物後補。問有否羨慕單文柔這麼年輕為人妻？馮盈盈笑說：「唔係羨慕遲定早，係羨慕嫁得好！」盈盈表示要向這目標進發。談到可有鼓勵好姊妹麥明詩盡快覓得男友？她笑說：「我有介紹男仔畀佢㗎，係我男朋友嘅朋友，係心臟科醫生，男女老少都啱。」問麥明詩進展如何？她笑稱：「朋友囉，我身體有事會搵佢，我拍劇又忙。」問到丁子朗，麥明詩是否合心意？他尷尬表示：「幾好，港姐冠軍又係十優，我唔抗拒。」談到會否介意姊弟戀？麥明詩說：「我未試過，但香港女性比較長壽，搵個細個自己就啱喇。再加上聽過女士去到某個年紀叫『狼虎之年』，搵個細過自己都係好嘅。」

此外，懷孕7個月的張名雅與老公拍拖到場，她透露今胎都是男仔，希望未來兩兄弟可互相扶持。至於是否封肚？她說：「想做吓嘢先，自己都喜歡拍嘢。」而王君馨認為現金祝賀最實際，談到夫妻相處之道，她認為夫妻關係要排第一，並要互相體諒。