李辰安 - 时兴虚拟资产 高回报有冇伏？｜辰来之笔

 

咁就20年

金融产品日新月异。

虚拟金融高回报有冇伏？

我行走中环话咁快已20年。

回想在这里讲第一个故事就系MBA。

今次要同大家讲拜拜，后会有期。

讲开又讲，在中环好快经过20年，今次要同大家讲拜拜，后会有期，回想在这里讲第一个故事，不知大家有否记忆？

大师兄讲：「安仔，你得闲都可以过嚟吹下水，唔系去移民？」如果我话去珠江新城返工，你又点睇？张翁话，广州可以坐高铁，话咁快就可以爱回家，所以唔使太过在意。不过，都系银行伟最有心，佢话，你同我哋几个酒友吹水，第一个故事系劝大家及时行乐，所以大家先至周五酒聚，唔好畀工作拖累。

大师兄话有印象，「你系讲MBA的故事嘛！」好啦，首先大家饮杯先，第一样要祝张翁无买虚拟资产，并且成功过到美人关。大家即时起哄，事关话题太热了，人在中环，周不时会遇到靓女投资顾问，如果大家投缘，可以上去Office了解一下，张翁就撞到正。「系，有位朋友个朋友个女，英国名牌大学毕业，喺中环某高级写字楼之金融公司返工，佢问我，有无兴趣玩下虚拟金融，每年10厘回报起表，20厘可期。」

虚拟金融高回报有冇伏？

一听就知有故事啦，「世侄，我行走中环半个世纪，有乜未见过？」你讲系咪咩靓女未见过？当然，我无讲出声而系好似好有耐心听佢讲故事。系咯，今日不如开支靓红酒，反正今次一聚，唔知几时咁齐人，所以叫靓仔侍应碧咸仔，帮我哋拣支好嘢。「系噃，每年20厘回报，听到都可以报案啦，张翁，咁你点回应？」其实，无论你系咪老江湖，抑或大学生，只要有贪念，随时中招啦，金融产品日新月异，我望下银行伟有乜反应，点知佢好淡定叹紧红酒，无表情。

「我同靓女讲，投资几多呀，佢话先开个一千万元户口熟习下，一亿元就最好。」我几乎畀杯酒呛到！张翁话，大家都算有少少朋友关系，我又唔好意思令人难做，「我有十万八万闲钱，都可以试下。」银行伟即时笑笑口︰「张翁，靓女分分钟上落几百万，你老人家唔好阻人时间啦。」

红酒有木香味，好似好嘢咁，几抵饮，系啦，靓女点答你？「佢话，咁呀，不如你留嚟抽银发债券啦，抽到有3厘几4厘息。」我再一次几乎畀红酒呛到，好啦，都系讲我喺呢度吹水讲嘅第一个故事。

话说，有位学霸女孩，从小都系AAA。「咦，辰哥，你想讲边个边个？」唔系边个边个，你听我讲埋先啦。AAA女孩挥低几千个竞争对手，荣获城中奖学金，到美国名牌大学读MBA。「我想补充，故事发生上世纪60年代，就算有奖学金，亦要低调生活，事关去美国生活成本好贵。」

AAA女孩毕业之后想进修博士课程。不过，导师建议她休息一下，原因读书读到太有精神压力，所以劝她唔好太搏命，医生开解AAA女孩，佢话佢有一位女同学，大学毕业之后，努力要实现佢嘅梦想，就系坐邮船环游欧洲，呢一个系好浪漫、好励志嘅想法，当然，更是昂贵玩意。那位女同学工作几年，先至储蓄一笔钱买船票，她手上所馀不多，但为了梦想，她还是决定起程。

大师兄话︰「我记得啦，女同学全程在邮船食罐头同面包，唔敢行出去同班后生朋友开Party，吃喝玩乐，原因怕无钱埋单。」系罗，原来完成整个旅程，落船嗰一刻，先至知道邮船吃喝玩乐系船飞包埋！好啦，大家都知道故事教训我哋乜嘢，最紧要开心，活在当下，今日有缘相聚，饮多杯，希望大家都活得开开心心，做人唔好勒住勒住，再见！

 

立即成为《星岛头条》App会员，即有机会赢走免费香港迪士尼乐园门票！https://bit.ly/46oBNJr

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ