网民力数香港侍应6宗罪！黑口黑面/零服务/自助斟水 最离谱是XX要收钱？
2023-08-14 00:00 
最近有港人在Facebook群组「饮食黑店大全 (全港食店质素关注组)」发文，大呻在餐厅经常遇到的不快经历，矛头直指香港侍应，怒轰餐厅侍应服务态度欠奉，更力数6宗罪，当中包括黑口黑面、态度差等等，最离谱是一样常见的物品要收钱？令楼主直呼「香港嘅侍应系咪已经唔当入嚟食嘢嘅人系客？」帖文随即引起网民热议，不过意见两极，不知大家对楼主的控诉又有没有共鸣？
网民力数香港侍应6宗罪1.黑口黑面
楼主大呻大部分餐厅侍应态度欠奉，亳无笑容之馀更对客人黑口黑面！「一入去，侍应已经X口X面问你『几位呀？』」楼主更指「连『欢迎光临』四个字都无！」令楼主感觉不被尊重：「好似入嚟食嘢得罪佢咁」。
网民力数香港侍应6宗罪2.无得拣位被逼「搭枱」
楼主又指在餐厅进食「基本上无得拣位」，食客不能任意选择座位，「就算勉强拣位，两人坐了坐4人卡位，都会好快格硬坐多2条友入嚟！」
网民力数香港侍应6宗罪3. QR code落单
楼主发现有不少餐厅转了QR code（二维码）下单点食物，楼主表示有时在不知情的情况下举手叫侍应，便会被指责「你试下自己嘟QR code先啦！」令他感到不方便。
网民力数香港侍应6宗罪4.自助形式零服务
楼主亦不满餐厅零服务，不少餐厅转用自助形式供应饮用水、餐具等等，楼主指：「如果叫人拎杯水，又会被人X『自己出去斟啦！』无错……原来已经很多餐厅要求客人自己出去斟水。」
网民力数香港侍应6宗罪5. 纸巾收费
有时进食完需要纸巾擦嘴，没有带备纸巾向餐厅索取是人之常情，有些餐厅会免费提供纸巾，不过有些餐厅则要额外收费。有次楼主向餐厅「拎张纸巾」，却被告知「3蚊1包」，惊讶发现：「唔知几时开始拎纸巾要收钱？」
网民力数香港侍应6宗罪6.碎碎念闹客
楼主最后表示，侍应不但黑口黑面、亳无笑容，有时会听到侍应碎碎念闹客，「有时会听到侍应口噏噏讲：『X，今日咁多人㗎，好心咪X入嚟，食过第2间啦！』」
网民力数香港侍应6宗罪！网民意见两极：QR code落单仲要收加一 VS 西客 VS 饮食业唔休做
楼主的帖文引起网民热议，当中意见两极，有部分网民感示有同感：「而家先知？去食餐饭要求佢咁」、「有招呼你都算好！我试过个收银自己开咗张单，就自己行左去，乜嘢都冇同我讲，之后行返过嚟闹我话唔跟住佢行。」、「我入嚟消费系享受！食要自己落单仲要收加一嘅服务费？」、「而家真系大部分茶餐厅文化都系咁」、「我之前喺某茶记，叫牛扒畀咗鸡扒我，嗰个阿姐仲揸主意错两份净系换一份畀我，跟住我问佢点解，佢仲要西面回应问我：『咁你食唔食呀？』真系火滚以后都冇帮衬！」、「上个礼拜去深圳食嘢，服务态度好到真系令我怀疑人生，香港已经冇得救啦！」、「其实好多连做人基本礼貌都冇，仲要收10%服务费」。
不过亦有部分网民持相反意见，认为楼主是「西客」，不理解服务业难处：「要乜服务都有就去五星大酒店啦，有时要体谅吓人哋人手唔够，仲要帮你呢样嗰样！！」、「人哋都系打份工啫，就系因为有你呢种人觉得好多嘢都系应份要畀你，所以有得拣啲人都唔会做餐饮」、「香港食客系咪永远觉得顾客是上帝，以为香港系日本？」、「其实以上讲呢啲，我完全包容到，因为已经显示咗喺食物价钱上」、「自己斟水有乜问题？人手唔够，个个要水咪好唔得闲；纸巾收费？合理呀，我见过啲人真系好浪费、好贪心」、「咩叫『欢迎光临』都无？呢句野对你入嚟食嘢有咩意义」、「客唔系大晒，搞清楚一样嘢，系你有求于人，你想要人哋嘅服务，冇人逼你要帮衬佢，凭咩要人哋就你？」。
亦有网民认为服务业生态「今时唔同往日」，饮食业「唔休做」：「主要系供求问题，回想起多年前SARS沙士期间，好多商户酒楼执笠，失业率高企。曾经入去机场美心食晚饭，全场两台枱分别共四人，你肯入去帮衬就系贵宾一样。」、「主因系以前服务好，客会畀贴士直接落番侍应袋，咁佢自不然会好招呼；而家全部加一又无贴士，畀著你做侍应都唔想你行入嚟，可以做少啲。」、「而家唔休做，因为复常后大把生意，上年疫情期间，间间堂食有折扣，外卖如是，入去当你神咁拜。」。
延伸阅读：港女狠批上环越南餐厅卖鸭仔蛋「不文明」呼吁抵制 店家2大原因坚持卖
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应