拍剧跳舞搞到家燕姐入院 Chilam练定「十字步」撑场

张智霖(Chilam)和谢天华日前为薛家燕12月举行的演唱会彩排，Chilam与家燕姐合唱大展歌喉，仲话拍剧个阵已结缘，所以对方开骚一定会力撑，仲练定「十字步」以备不时之需：「我已经拉定筋架啦，随时准备好！不过我同家燕姐唱歌就好夹，但跳舞就真系唔多夹，记得上一次同佢拍剧嗰阵，因为跳一小段舞，搞佢整亲要入医院，呢个成为我童年阴影。」

家燕姐听到合不拢嘴，笑指当年全靠Chilam急才避过急症室排长龙睇医生：「个时跳舞整亲要去急症室，点知等好耐都冇医生睇我，Chilam冇啦啦攞份马经入黎问我买边只，我心谂依家咪搞我啦！原来佢就系想分散我注意力，静静鸡急Call跌打师傅嚟，然后佢对护士话铁打师傅系我亚叔，当时我仲一头雾水唔知边个亚叔黎探病，铁打师傅几下手势就搞掂，原来系我软骨移位，我仲可以急急脚出院。」

演唱会彩排踏入最后阶段，家燕姐与乐队默契十足，不过因疲劳过度出现喉咙痛，吓得家燕姐急急搵医生保护声带：「我好乖依时食药，依家就冇咩事，不过唔可以讲太多嘢，要小心食嘢先得。」

而谢天华早前笑家燕姐「有份量」，激发对方减磅，天华呢日亦大赞家燕姐修身有成效：「因为我地一见面都揽揽，好明显都瘦左，为观众做到最好状态系值得的。（你仍然一日只可抱佢一次？）我尝试紧一日抱佢两次，因为我自己都做紧健身，加上之后都要彩排，所以希望做到两次啦！（家燕姐瘦咗话只著裤松怕走光？）叫造型师帮佢改晒像筋裤头啦，一定包冇事！」