梁靖琪痛心柬埔寨雏妓2岁已遭施暴 推圣诞福袋捐输助重生

近日凭网剧《蚀日风暴》人气急升、获网民激赞为新一代演技派女星的梁靖琪（Toby），事业得意之馀，爱情亦交出漂亮的成绩单。Toby与圈外男友Jon拍拖一年多，感情稳定，近日二人应国际慈善团体AIM（Agape International Missions）邀请，到柬埔寨探访曾被卖到妓寨的女孩。这次访问令Toby留下深刻印象，得到男友大力支持的她，决定以行动唤醒大众关注，将于圣诞节推出慈善福袋，并把部分收益捐到AIM，支持孩子重过新生。

Toby早前透过男友Jon，认识到国际慈善团体AIM：「Jon一向好有爱心，喺佢介绍下我接触到AIM，今次仲同一班教会朋友，一齐到访AIM位于柬埔寨嘅安全屋。其实我哋去过不同地方，今次系最有意义嘅一次，因为可以学到好多嘢。亲眼睇到小朋友嘅经历之后，我哋两个都好想为AIM做更多，畀多啲爱佢哋。」Toby笑言和Jon的拍拖行程，有别于一般情侣的行街睇戏，「我哋会一齐去做义工，有时仲会带埋屋企人帮手！呢方面我哋目标一致，嚟紧会投放更多心力喺慈善上。」

柬埔寨的安全屋内，住满了被救出的雏妓，忆述一个又一个故事时，Toby不禁眼红：「探访咗一个礼拜左右，今次嘅情况好特别，因为佢哋（AIM）起咗呢间安全屋已经有10年，但系从未邀请过任何人入去帮手，今次我哋就帮佢哋油漆，陪小朋友唱歌、玩游戏等等。」

「之前听过有啲2岁嘅小朋友被父母卖初夜，今次见到安全屋入面最细嘅小妹妹只得3岁，觉得好心痛，谂到我周围嘅契女、姨甥仔，觉得我哋真系拥有好多、好幸福，所以每晚我哋围埋食饭讨论时，都忍唔住流泪；临返港前亦好唔舍得，揽住男朋友系咁喊，希望以后一年去一次，帮到佢哋更多。 」

回港后，Toby决定身体力行，以生命影响生命，于圣诞节期间推出慈善福袋，并将部分收益捐到AIM，为悲惨儿童出一分力：「嚟紧会推出全新hamper，入面有啲卡片，系安全屋嘅女童亲手做嘅；另外，我哋亦会捐出朱古力礼盒嘅30%收益，支持AIM长远发展，希望大家可以多多支持。同时亦想带出一个讯息，有能力帮人系一件好幸福嘅事，为朋友准备圣诞礼物嘅同时，可以做埋善事，将爱分享开去，自己都会开心。」

善心爆棚的她更为AIM策划了一系列的宣传工作：「好开心喺嚟紧2019年可以继续帮到AIM，去做不同嘅活动。其实佢哋喺美国已经好多人知道，但系喺亚洲地区、我哋身处嘅香港，暂时未有好多人了解到呢个机构。明年1月，会帮佢哋安排一啲活动，希望可以令多啲人认识到AIM、真正帮到佢哋。」

除了卖福袋行善，Toby最近被爆出钱襄助，帮财困的林秀怡买下大堆囤积的日本品牌安全套，Toby表示：「此举除了是帮助朋友，亦可顺道将安全性行为的讯息融入柬埔寨探访之旅，相得益彰！总之可以帮助别人的事情，我都会尽力去做，这也是我2019年的目标。」