维港会: 介绍气象科普知识 天文台靓抽FB「inbox」文化

近期不少Facebook专页为咗与网民加强互动，增加专页嘅「engagement」，都会要求网民留言，然后「inbox」回应。不过，天文台Facebook专页昨日就「靓抽」呢个新现象，系介绍新一则《天气随笔》时，讲明「我唔用inbox答你,我直接答你」，获唔少网民欣赏，成功「呃Like」。
话说天文台呢个Po，系向读者介绍最新嘅《天气随笔》，讲解热带气旋「云雀」反其道而行，先去日本本州，再西行到九州出海兜圈，之后再横过东海吹袭上海一带嘅反传统路径，以及与近期日本热爆表有无关系等。不过网民最「Like」嘅，系天文台小编借机「抽水」，讽刺近期唔少Facebook专页要网民留言，再「inbox」解答嘅文化，除咗讲明唔使inbox，「In你个头」，仲俾埋条link你直接睇答案，hashtag埋「#Yo长知识啫唔使咁麻烦啦」。唔少网民留言大赞「靓抽」、「好波」，似乎网民对呢种「inbox」文化都几厌恶咁喎。