阿仔求其送风扇畀张继聪　谢安琪目击：当时佢冇接到

张继聪同老婆谢安琪（Kay）一家四口好幸福，昨日系父亲节，细女张靖仲系BB，未识送礼物畀爸爸，10岁囝囝张瞻算系有啲表示，拎出自己唔锺意嘅风扇仔，好「潇洒」咁贺父亲节。知足嘅张继聪都有收好份小礼物，并留言多谢阿仔：「我个仔送俾（畀）我嘅父亲节礼物，我问佢：你买架（㗎）？佢话：唔知边道搵出嚟....我谂依份礼物嘅寓意系....吹咩！？Anyways，多谢，外景啱用」。

目击事件经过嘅Kay，搞笑赞两仔爷系「潇洒的父子」，详细交代当时嘅来龙去脉。佢喺社交平台留言：「今日父亲节，我个仔乜嘢都冇准备，我老公赞佢潇洒。然后我问佢系咪应该都有少少野（嘢）送俾（畀）爹哋？于是佢唔知系边度摷到一个，佢自己唔锺意嘅风扇，晚餐时送俾（畀）爹哋。然而，佢老豆（窦）都好潇洒：佢见到个仔俾（畀）份咁嘅礼物佢，佢接都冇接到，手都冇伸出嚟。只系问左（咗）一句：个风扇仔你买㗎？个仔答：头先唔知喺边度搵到既（嘅）。个风扇就咁滞留咗系（喺）枱面，场面相当无奈。完。」 原以为父亲节礼物事件现「罗生门」，张继聪最终冇要到风扇，网民都叫两公婆「夹口供」。不过Kay再加插留言，交代风扇嘅去向，「PS：饭后，老豆（窦）发左（咗）post，多谢仔仔既（嘅）礼物，小风扇总算守得云开见月明，关心小风扇下场既（嘅）朋友，你地（哋）可以放心喇」。