必定又再「尸横遍野」｜曾智华
2024-10-17 16:06 
凡台风来临前，政府有关部门尤其是天文台及消防处，必定再三警告市民，切勿滑浪甚或走近岸边。点解？唔该上网睇睇凡台风袭港时，巨浪可以扑到几高？你唔识死，就被卷走，瓜硬嘅事，请勿累人救你！
大鳄对撼 股市巨浪滔天
其实股市都一样，上周癫到几千点上落的日子，你作为散户，有乜资格跳入去同大鳄玩？真的想用舌尖试利刀？
一日破纪录几千亿上落，指数狂升狂插，边个有能力搞成咁？当然是国际级大鳄在对撼，赌一铺大嘅，于是造成股市巨浪滔天。
小弟观股市几十年，仍是第一次见到咁劲景象。当然自己知自己事，收手唔买唔沽睇吓「大戏」先。不过此时仍有不少散户心痒手痕，觉得冇理由唔玩，尤其无知之辈，被搵食经纪猛游说下，怦然心动。
上周二我在土瓜湾坐小巴出旺角，本来冇留意隔篱买餸位师奶电话讲乜，但佢越讲越兴奋，旁边乘客唔听唔得。
师奶话：「系呀，我世侄做证券经纪㗎，话呢轮好多客发过猪头炳，猛叫我快啲开户炒即日期指，有杀错无放过，因一日上落千几二千点，若果买中升或跌，一日已可发达呀！反正成本唔多，若势色唔对，立即平仓即可。你听朝得唔得闲，一齐上佢公司玩吓好唔好？」
睇佢个款，都几肯定在游说另一位师奶炒即日鲜期指。讲讲吓，目送佢喺公屋何文田邨落车，唉……真系弊。
太多散户贪心又无知
小市民、打工族、师奶仔，储一百几十万何其困难？但狂风巨浪时走去「玩浪」（炒期指），真系一日就可以打靶。
不过市场有太多既贪心又无知的散户水鱼，被利益相关者（例如狂赚你佣的经纪）说两说，又冇专业知识，就咁签文件，即时开始被揿。
鳄鱼潭绝对大食细，大户掌握资讯、大量智囊、拥新科技、经验丰富、赌本雄厚，加上毫无血性心狠手辣，更擅用金融工具出击，在股市中根本就是个巨人；散户则只是蝼蚁水鱼，你想在巨人手指罅中赚大钱？唉唉唉，发梦冇咁早，继续下去，必有另一次尸横遍野。
资深传媒人 曾智华
相关文章：
最新回应