Jeffrey爆笑吹口哨神技搞喊陈蕾 同Kaho首合作互度惊人项目失晒控丨独家
2024-10-17 07:00 
陈蕾、Jeffrey（魏浚笙）和洪嘉豪（Kaho）首度合作《Katch Our Life》音乐会，一年开咁多Show，叫三人为对方度一个一鸣惊人的演出项目去震慑观众，Jeffrey就自爆「吹功」了得，即场以吹口哨示范吹牧童笛绝技，由于太「技惊四座」，令陈蕾及工作人员笑到喊，再流住泪向Kaho「哭」诉，「你个Friend癫过你」。采访：杜杜 摄影：罗安强 发型:Haysses Ip@i Private i@heixx_(Kaho)、Cliff Chan@Myös@myos_cliffchan(陈蕾)、Holam Chong(Jeffrey) 化妆:Circle Chong@circlexoo(Kaho)、Tammy Au@tammyau_makeup(陈蕾)、Blair Chan(Jeffrey) 服装:@lanecrawford(Kaho) 场地:BLACKROOM@blackroomhk
Jeffrey跟Kaho曾合作电影《超神经械劫案下》，再合作开Show好振奋，「电影时已结咗盟，十分期待，蕾记系新识嘅朋友，大家同一类，交流冇乜隔膜。」陈蕾觉得跟两人合作好放松，「自己演唱会，自己歌，要好有message，但同佢哋一齐表演，只想令大家睇得开心。」Kaho跟两人都熟，但开骚是首次，「今年做咗好多好困难嘅工作，开演唱会好大挑战，好大压力，可以有机会同佢哋一齐，畀我喺音乐上放多少少出嚟，好开心好减压。」
互数缺点变疯狂赞美
叫三人互数对方缺点，Kaho就疯狂讲反话赞陈蕾，「我就真系搵到佢哋缺点，阿蕾嘅缺点系太完美，喺佢隔离有少少惭愧，而笙记缺点就净系睇到人哋优点，搞到我冇进步空间，我有时话，『你可唔可以讲啲我唔好嘅嘢？』佢话你都冇唔好。」Jeffrey解释：「基督教话，我哋只讲成就人嘅说话。」陈蕾好无奈：「冇谂过我哋带畀你咁多困扰，真系好对唔住。」Kaho再补充，「缺点太明显，我头先讲啲嘢喺农夫访问度抄返嚟。」
Jeffrey认为成就即赞赏，两拍档优点就好易搵，「缺点嚟讲，真系点搵呀？！」Kaho笑着赞：「有戏㗎喎！」陈蕾认同，「对手要Kaho呢啲先带到佢出嚟。」陈蕾好辛苦终于谂到两男缺点，「佢哋太风趣幽默同靓仔，太易令人分心，我头先答答吓问题，『我讲紧咩话？！』成日分心，今日啲访问都唔系答得咁好。」提到演出时两男再悉心打扮点算？陈蕾直言好惊，「𠵱家都有啲手震，希望佢哋都睇住我罗！我尽量唔望佢哋。」
Jeffrey好锺意示范
好辛苦先讲完对方缺点，再要三人为拍档，度一个惊天动地的表演项目。陈蕾笑言一直要求Kaho表演吹Di Dar，但对方「睬佢都傻」，Kaho强硬：「几多群众压力都冇人可以逼到我！」陈蕾改向Jeffrey发功，「有冇兴趣挑战牧童笛？」Jeffrey秒回：「牧童笛OK，精英嚟喎！想当年大家都买白色牧童笛，我就特登买支黑色。」陈蕾追问：「有咩咁特别？！」Jeffrey解释：「个款型啲罗，音质完全一样，都响㗎！」陈蕾狂笑同Kaho讲：「你个friend讲嘢癫过你喎！」
Jeffrey知Kaho识吹Di Dar劲兴奋，跟对方研究吹法，「Di Dar都系用吐音，牧童笛吐啲音出嚟响亮清晰啲，我以前玩长笛，系吐吐吐咁出嚟。」陈蕾听到Jeffrey识吹长笛好愕然，但Jeffrey懒理佢嘅愕然，继续用口哨示范何谓吐音，佢努力吐，全场所有人笑到喊，因为完全听唔出同一般吹口哨有咩分别。陈蕾「喊」住话：「好多谢，唔该你嘅表演呀！」Kaho笑谓：「我真系想吐！」陈蕾叫大家幻想吓，若然Kaho的Di Dar同Jeffrey的牧童笛合奏会有几精彩，「我谂佢哋练习，系咁对住我吐吐吐，到表演时真系好分心，真系惊！」Kaho提议Jeffrey可吊威吔飞住出场，陈蕾就可表演口中喷火，但太危险要Encore部份先好表演。Jeffrey就建议两人可互数白榄，Jeffrey见大家不明同Rap的分别，又示范何谓数白榄，「我今日好开心，喺呢度做访问！」由于场面再度失控，访问被逼叫停。
最新回应